अहिल्यानगर : अहिल्यानगर (Ahilyanagar) जिल्ह्यातील श्रीरामपुरात शिवसेना (शिंदे गट) (Shinde Shivsena) युवा विधानसभा संघटक प्रशांत कहाणे (Prashant Kahane) यांच्यावर अज्ञात हल्लेखोरांनी गोळीबार (Firing) केल्याची धक्कादायक घटना घडली आहे. सुदैवाने हल्लेखोरांचा नेम चुकल्याने कहाणे थोडक्यात बचावले असून या घटनेमुळे परिसरात खळबळ उडाली आहे.Crime News
मिळालेल्या माहितीनुसार, सोमवारी रात्री सुमारे ९.४५ वाजण्याच्या सुमारास गोंधवणी परिसरात ही घटना घडली. प्रशांत कहाणे हे आपल्या चारचाकी वाहनातून जात असताना दुचाकीवरून आलेल्या अज्ञात व्यक्तींनी त्यांच्या गाडीवर गोळीबार केला. अचानक झालेल्या या हल्ल्यामुळे काही काळ परिसरात भीतीचे वातावरण निर्माण झाले.
गोळी गाडीच्या दिशेने झाडण्यात आली होती, मात्र नेम चुकल्यामुळे कहाणे यांना कोणतीही दुखापत झाली नाही. त्यामुळे मोठी दुर्घटना टळली. हल्लेखोर गोळीबारानंतर घटनास्थळावरून फरार झाले.
घटनेची माहिती मिळताच वरिष्ठ पोलीस अधिकारी आणि स्थानिक पोलीस घटनास्थळी दाखल झाले. पोलिसांनी परिसराची पाहणी करून पुरावे गोळा करण्यास सुरुवात केली आहे. तसेच हल्लेखोरांचा माग काढण्यासाठी परिसरातील सीसीटीव्ही फुटेजची तपासणी सुरू करण्यात आली आहे.
प्रशांत कहाणे यांच्यावर हल्ला नेमका कोणत्या कारणातून करण्यात आला, याबाबत अद्याप स्पष्ट माहिती समोर आलेली नाही. राजकीय वाद, वैयक्तिक कारण किंवा इतर कोणता हेतू याचा तपास पोलीस करत आहेत.
दरम्यान, भररस्त्यात राजकीय पदाधिकाऱ्यावर झालेल्या गोळीबाराच्या घटनेमुळे श्रीरामपुरात तणावाचे वातावरण निर्माण झाले असून नागरिकांमध्येही चिंतेचे वातावरण आहे. पोलिसांनी आरोपींचा शोध घेण्यासाठी विशेष पथके नियुक्त केली असून पुढील तपास सुरू आहे.