मुंबई : जागतिक क्रिकेटमधील सर्वोत्तम फलंदाजांपैकी एक केन विल्यमसनने आंतराष्ट्रीय क्रिकेटमधून निवृत्ती घेतली आहे. त्याच्या निवृत्तीने न्यूझीलंड संघाला मोठा धक्का बसला आहे. इंग्लंड दौऱ्यातील लॉर्ड्स कसोटीनंतर विल्यमसनने आपल्या 16 वर्षांच्या शानदार कारकिर्दीला पूर्णविराम दिला. याआधी मर्यादित षटकांच्या क्रिकेटमधून निवृत्ती घेतलेल्या विल्यमसनने आता कसोटी क्रिकेटलाही अलविदा करत आंतरराष्ट्रीय क्रिकेटच्या सगळ्या प्रकारांतून निवृत्ती घेतली आहे. देशासाठी खेळणे हे माझ्यासाठी स्वप्न होते. प्रत्येक सामन्यात मी माझे शंभर टक्के योगदान देण्याचा प्रयत्न केला आणि आता योग्य वेळी निवृत्ती घेत असल्याचा मला आनंद झाला आहे, असे निवृत्तीनंतर केन विल्यमसन म्हणाला.
केन विल्यमसनची आंतराष्ट्रीय क्रिकेटमधील कामगिरी
केन विल्यमसन हा न्यूझीलंड क्रिकेटच्या इतिहासातील सर्वाधिक धावा करणारा फलंदाज आहे. त्याने तिन्ही फॉरमॅटमध्ये मिळून तब्बल 19 हजार 346 धावा केल्या आहेत. यात त्याच्या नावावर 48 आंतराष्ट्रीय शतकंही आहेत. कसोटी क्रिकेटमध्ये त्याने 9 हजार 515 तर वनडेमध्ये 7 हजार 256 आणि टी-20 आंतरराष्ट्रीय क्रिकेटमध्ये 2 हजार 557 धावा केल्या आहेत.विल्यमसनच्या नेतृत्वाखाली न्यूझीलंडने 2019 वनडे विश्वचषकाच्या अंतिम फेरीत धडक मारली होती. त्या स्पर्धेत तो प्लेअर ऑफ द टूर्नामेंट ठरला होता. तसेच त्याच्या नेतृत्वात न्यूझीलंडने क्रिकेट इतिहासातील पहिली ICC World Test Championship Final 2021 जिंकत इतिहास रचला होता.(FIFA WORLD CUP)
कर्णधार म्हणूनही त्याची कामगिरी प्रभावी ठरली आहे. कसोटी क्रिकेटमध्ये त्याने 40 सामन्यांत नेतृत्व करत 22 विजय मिळवले. वनडेमध्ये 91 सामन्यांत 46 विजय, तर टी-20 क्रिकेटमध्ये 75 सामन्यांत 39 विजय त्याच्या नावावर आहेत. शांत स्वभाव, उत्कृष्ट नेतृत्व आणि सातत्यपूर्ण फलंदाजीमुळे विल्यमसनला क्रिकेटविश्वात विशेष मान मिळाला. त्याच्या निवृत्तीनंतर न्यूझीलंड क्रिकेटमधील एका सुवर्ण पर्वाचा शेवट झाला आहे. आधुनिक क्रिकेटमधील सर्वात आदर्श आणि संयमी क्रिकेटपटूंपैकी एक म्हणून केन विल्यमसनचे नाव कायम स्मरणात राहील.