Nashik Crime : रिक्षामध्ये प्रवाशांची फसवणूक करून सोन्याचे दागिने चोरणाऱ्या दोन आरोपींना अंबड पोलिसांच्या (Ambad Police) गुन्हे शोध पथकाने आणि गुंडा विरोधी पथकाने संयुक्त कारवाईत अटक केली असून, त्यांच्याकडून सुमारे २३ लाख रुपये किमतीचे १५ तोळे सोन्याचे दागिने व गुन्ह्यात वापरलेली रिक्षा जप्त करण्यात आली आहे.
याबाबत पोलिसांनी दिलेल्या माहितीनुसार, उंटवाडी (Untwadi) येथील रहिवासी नलिनी धनाजी गोसावी (वय ५८) यांनी अंबड पोलीस ठाण्यात (Ambad Police Station) तक्रार दाखल केली होती. ६ जून रोजी रात्री त्या कुरूकवाडे येथून निमाणी बसस्थानकावर (Nimani Bus Stand) उतरून रिक्षाने घरी जात होत्या. यावेळी रिक्षाचालकाने गॅस संपल्याचा बहाणा करून त्यांना मध्येच उतरविले. त्यानंतर दुसऱ्या रिक्षाने त्या घरी पोहोचल्या. घरी गेल्यानंतर बॅगेतील सोन्याचे दागिने चोरी झाल्याचे त्यांच्या निदर्शनास आले. याप्रकरणी अंबड पोलीस ठाण्यात (Ambad Police Station) अज्ञात आरोपीविरोधात गुन्हा दाखल करण्यात आला होता. (Nashik Crime News)
आरोपींच्या हालचालींचे १५० सीसीटीव्ही फुटेज
गुन्ह्याचा तपास करताना पोलिसांनी फिर्यादींच्या घरापासून निमाणी बसस्थानकापर्यंत तसेच आरोपींच्या हालचालींचे सुमारे १५० सीसीटीव्ही फुटेज तपासले. त्यातून संशयितांची ओळख पटली. पोलिसांनी रविंद्र मल्लू घुमडकर (वय ३७, रा. म्हसरूळ) याला ताब्यात घेतले असता त्याने गुन्ह्याची कबुली दिली. त्याच्याकडून गुन्ह्यात वापरलेली रिक्षा जप्त करण्यात आली. तसेच दुसरा आरोपी रमेश बाबुराव जाधव (वय ५३, रा. अमृतधाम, नाशिक) याला गुंडा विरोधी पथकाने ताब्यात घेऊन त्याच्याकडून चोरीचे सोन्याचे दागिने हस्तगत केले. या कारवाईत दोन्ही आरोपींकडून रिक्षा आणि सोन्याचे दागिने असा एकूण २३ लाख रुपयांचा मुद्देमाल जप्त करण्यात आला आहे.
पोलीस आयुक्त संदीप कर्णिक यांच्या मार्गदर्शनाखाली पोलीस उप आयुक्त (गुन्हे) किरणकुमार चव्हाण, पोलीस उप आयुक्त किशोर काळे, सहा पोलीस आयुक्त (गुन्हे) संदिप मिटके, सहायक पोलीस आयुक्त सचिन बारी, तसेच अंबड पोलीस ठाणेचे वरिष्ठ पोलीस निरीक्षक जग्वेंद्रसिंग राजपुत तसेच पोलीस निरीक्षक अविनाश नडविनकेरी (गुन्हे) व पोलीस निरीक्षक शंकर वाघमोडे (प्रशासन) यांचे मार्गदर्शनाप्रमाणे गुन्हे शोध पथकाचे पोलीस अधिकारी सहाय्यक पोलीस निरीक्षक विलास पडोळकर, गुंडा विरोधी पथकाचे पोलिस उपनिरिक्षक संदिप पवार, पोलिस हवालदार सुनिल आडके, अवी देवरे , विजय सुर्यवंशी, योगेश देसले, सुभाष ठुबे, समाधान शिंदे,, उल्हास गांगुर्डे, केशव ढगे, सागर जाधव, तुषार मते, अनिल गाढवे, फरीद ईनामदार, वैभव एखंडे, मयुर पवार आदींनी कामगिरी केली असुन पुढील तपास पोहवा योगेश देसले हे करित आहे.