Kalyan Accident : कल्याण : कल्याण (Kalyan) शहरातून एक हृदयद्रावक घटना समोर आली आहे. पत्नीला माहेरी सोडून अवघ्या काही मिनिटांत घरी पोहोचणार असलेल्या तरुणाचा दुर्दैवी अपघातात मृत्यू झाला आहे. प्रेम भाटी (Prem Bhati) असे मृत तरुणाचे नाव असून तो सोशल मीडियावरील रील्समुळे परिसरात चांगलाच परिचित होता. (Accident News)
मिळालेल्या माहितीनुसार, प्रेम भाटी याच्या पत्नीच्या भावाची प्रकृती बिघडल्याने तो पत्नीला कल्याणमधील योगिधाम परिसरात तिच्या माहेरी सोडण्यासाठी गेला होता. पत्नीला सुरक्षितपणे माहेरी सोडल्यानंतर तो रात्री उशिरा मोहने येथील आपल्या घराकडे परतत होता.
रात्री सुमारे ११ वाजण्याच्या सुमारास तो घरापासून काही अंतरावर असताना त्याच्या वडिलांनी फोन करून तो कुठपर्यंत पोहोचला याची विचारपूस केली. त्यावेळी प्रेमने "दहा मिनिटांत घरी पोहोचतो," असे सांगितले होते. मात्र नियतीला काही वेगळेच मान्य होते.
घरी पोहोचण्याआधीच रस्त्याच्या कडेला कामासाठी साठवून ठेवलेल्या खडीवरून त्याच्या दुचाकीचा तोल गेला. दुचाकी घसरल्याने प्रेम रस्त्यावर जोरात कोसळला. या अपघातात त्याच्या डोक्याला गंभीर दुखापत झाली.
घटनेनंतर स्थानिक नागरिकांनी तातडीने मदतीसाठी धाव घेत प्रेमला जवळच्या रुग्णालयात दाखल केले. मात्र गंभीर दुखापतीमुळे उपचारादरम्यान त्याचा मृत्यू झाला.
या अचानक घडलेल्या घटनेमुळे भाटी कुटुंबावर दुःखाचा डोंगर कोसळला आहे. काही मिनिटांत घरी परतण्याचे आश्वासन देणारा मुलगा कायमचा निघून गेल्याने कुटुंबीय आणि मित्रपरिवार शोकसागरात बुडाला आहे. परिसरातही हळहळ व्यक्त केली जात असून रस्त्यावर निष्काळजीपणे टाकलेल्या खडीमुळे हा अपघात घडल्याचा आरोप नागरिकांकडून केला जात आहे.