गडचिरोली: गडचिरोलीसारख्या दुर्गम आणि नक्षलवादग्रस्त भागातील विद्यार्थ्यांच्या स्वप्नांना आता जागतिक पंख मिळत आहेत. 'लॉयड मेटल्स अँड एनर्जी लिमिटेड' (LMEL) ने त्यांच्या अत्यंत महत्त्वाकांक्षी 'ग्लोबल एज्युकेशन प्रोग्राम'च्या चौथ्या बॅचसाठी अर्ज प्रक्रिया सुरू केली असून, याद्वारे गडचिरोलीतील गुणवंत विद्यार्थ्यांना ऑस्ट्रेलियातील नामांकित कर्टिन विद्यापीठात (Curtin University) उच्च शिक्षण घेण्याची सुवर्णसंधी उपलब्ध झाली आहे.
काय आहे हा उपक्रम?
लॉइड्स इन्फिनिट फाउंडेशनच्या माध्यमातून राबविण्यात येणारा हा उपक्रम श्री. बी. प्रभाकरन यांच्या मार्गदर्शनाखाली गडचिरोलीच्या सर्वांगीण विकासासाठी सुरू करण्यात आला आहे. आतापर्यंत या कार्यक्रमांतर्गत २४ विद्यार्थी ऑस्ट्रेलियात शिक्षण घेत आहेत. ग्रामीण भागातील प्रतिभावान तरुणांना जागतिक दर्जाचे शिक्षण देऊन त्यांचे भविष्य घडविणे, हा या उपक्रमाचा मुख्य उद्देश आहे.
अर्ज प्रक्रिया आणि पात्रता
या शिष्यवृत्तीसाठी इच्छुक विद्यार्थ्यांनी खालील निकष पूर्ण करणे आवश्यक आहे:
शिक्षण पात्रता: ज्या विद्यार्थ्यांनी बारावी (PCM/PCMB) किंवा विज्ञान शाखेतील पदवी परीक्षेत किमान ६० टक्के गुण मिळवले आहेत, ते या कार्यक्रमासाठी पात्र आहेत.
अर्ज कालावधी: अर्ज प्रक्रिया १३ जून ते २० जून २०२६ या कालावधीत खुली आहे.
श्री. बी. प्रभाकरन काय म्हणाले?
या उपक्रमाविषयी बोलताना लॉयड्स मेटल्सचे व्यवस्थापकीय संचालक श्री. बी. प्रभाकरन म्हणाले की, “देशातील काही अत्यंत हुशार विद्यार्थी अशा भागांतून येतात जिथे संधींची कमतरता असते. आम्ही केवळ शिक्षणच नाही, तर या विद्यार्थ्यांना त्यांच्या महत्त्वाकांक्षा पूर्ण करण्यासाठी लागणारा आत्मविश्वासही देत आहोत. जिल्ह्यातील विद्यार्थी आज परदेशात शिक्षण घेऊन स्वतःसाठी नवीन संधी निर्माण करत आहेत, हे पाहून खूप अभिमान वाटतो.”
बदलते गडचिरोली
आर्थिक अडचणींमुळे अनेकदा गडचिरोलीतील हुशार विद्यार्थ्यांचे परदेशात शिकण्याचे स्वप्न अपूर्ण राहते. मात्र, लॉयड्स मेटल्सच्या या पुढाकारामुळे हे 'आर्थिक अंतर' कमी होण्यास मदत झाली आहे. या चौथ्या बॅचच्या घोषणेमुळे गडचिरोलीतील तरुणांमध्ये उत्साहाचे वातावरण असून, त्यांना आपल्या करिअरला एक नवी दिशा देण्याची संधी मिळाली आहे.