परतूर (जालना): जालना जिल्ह्यातील परतूर येथील एका नामांकित शाळेत वार्षिक स्नेहसंमेलनादरम्यान आयोजित नृत्याच्या कार्यक्रमाने नवा वाद निर्माण केला आहे. शाळेतील शाळकरी मुलांनी हातात बनावट तलवारी घेऊन एका पाकिस्तानी गाण्यावर नृत्य केल्याचा आणि त्यादरम्यान पाकिस्तानमधील दहशतवादी मुमताज कादरी याचा फोटो प्रदर्शित केल्याचा धक्कादायक प्रकार समोर आला आहे. या घटनेचा व्हिडीओ सध्या सोशल मीडियावर मोठ्या प्रमाणात व्हायरल होत असून संताप व्यक्त केला जात आहे.
नेमकी घटना काय?
मिळालेल्या माहितीनुसार, परतूर येथील 'किड्स वर्ल्ड इंग्लिश स्कूल'च्या वार्षिक स्नेहसंमेलनात विद्यार्थ्यांनी 'गुस्ताख-ए-नबी की एक सजा' या पाकिस्तानी गाण्यावर नृत्य सादरीकरण केले. विशेष म्हणजे, सादरीकरणादरम्यान स्क्रीनवर मुमताज कादरी याचे छायाचित्र दाखवण्यात आले. मुमताज कादरी हा पाकिस्तानमधील तोच दहशतवादी आहे ज्याने ईशनिंदेचा आरोप असलेल्या आशिया बीबी या ख्रिश्चन महिलेचे समर्थन केल्याप्रकरणी पंजाब प्रांताच्या राज्यपालांची हत्या केली होती.
EXCLUSIVE:
During Annual Day programme of Kids World English School in Partur, Jalna — school children danced on the Pakistani song of "Gustakh Nabi Ki Ek Saza..." with dummy swords.
In the background, they had celebrated with photo of Pakistani terrorist Mumtaz Qadri, who had… pic.twitter.com/bq7PbUJYb2
— Treeni (@treeni) June 16, 2026
संस्था व्यवस्थापनाचा खुलासा
शाळेत अशा प्रकारच्या नृत्याचे आयोजन आणि दहशतवाद्याचे समर्थन करणाऱ्या व्यक्तीचे फोटो दाखवल्याने शाळा व्यवस्थापनावर टीकेची झोड उठत आहे. शाळा CBSE बोर्डाशी संलग्न असल्याने मुलांमध्ये अतिरेकी विचारसरणी रुजवण्याचा प्रयत्न केला जात असल्याचा गंभीर आरोप होत आहे.
या प्रकरणावर स्पष्टीकरण देताना शाळा व्यवस्थापनाने म्हटले आहे की:
हा व्हायरल होत असलेला व्हिडीओ दोन वर्षांपूर्वीचा आहे.
कार्यक्रमाच्या बॅकग्राऊंड स्क्रीनचे काम बाहेरील कंत्राटदाराला दिले होते.
स्क्रीनवर कोणाचा फोटो चालवला, याची माहिती व्यवस्थापनाला नव्हती.
प्रशासनाकडून चौकशी सुरू
या प्रकारामुळे संताप व्यक्त करत अनेक सामाजिक संघटनांनी या घटनेची गंभीर दखल घेतली आहे. या संस्थेवर कडक कारवाई करण्याची मागणी राष्ट्रीय बाल हक्क संरक्षण आयोग (NCPCR), महाराष्ट्र पोलीस महासंचालक आणि जालना पोलीस अधीक्षक यांच्याकडे करण्यात आली आहे. याप्रकरणी परतूर पोलिसांनी शाळेचे चालक तारीख सिद्धीकी यांची चौकशी सुरू केली असून, पुढील तपास सुरू आहे.