पिंपरी-चिंचवड : वैद्यकीय क्षेत्राला काळीमा फासणारी एक धक्कादायक घटना पिंपरी-चिंचवडमधील (Pimapari- Chinchwad) आकुर्डी (Akurdi) येथे उघडकीस आली आहे. रुग्णालयात उपचारासाठी दाखल असलेल्या एका ३७ वर्षीय महिलेचा चक्क उपचार करणाऱ्या डॉक्टरानेच विनयभंग केल्याची संतापजनक घटना घडली आहे. या प्रकरणी निगडी पोलिसांनी आरोपी डॉक्टराला बेड्या ठोकल्या आहेत.
नेमकी घटना काय ?
मिळालेल्या माहितीनुसार, पीडित महिला पाठीच्या मणक्याच्या उपचारासाठी ८ जून रोजी आकुर्डीतील 'चेतना रुग्णालयात' दाखल झाली होती. ११ जून रोजी महिलेवर यशस्वी शस्त्रक्रिया पार पडली. महिला रुग्णालयातच उपचार घेत असताना १४ जून रोजी पहाटेच्या सुमारास डॉ. धैर्यशील शेटके याने महिलेच्या वार्डमध्ये प्रवेश केला. यावेळी पीडित महिला आपल्या पतीसोबत होती.
उपचाराच्या बहाण्याने जवळ आलेल्या डॉक्टरने महिलेसोबत गैरवर्तन करण्यास सुरुवात केली. अचानक घडलेल्या या प्रकारामुळे घाबरलेल्या महिलेने आरडाओरडा केला. महिलेचा आवाज ऐकून तिथे उपस्थित असलेल्या पतीला धक्काच बसला. त्यानंतर महिलेच्या पतीने तात्काळ या प्रकाराची माहिती निगडी पोलिसांना दिली. घटनेची माहिती मिळताच निगडी पोलिसांनी तात्काळ रुग्णालय गाठले आणि पीडित महिलेच्या तक्रारीवरून गुन्हा दाखल केला. पोलिसांनी या प्रकरणी आरोपी डॉ. धैर्यशील शेटके याला अटक केली असून, पुढील तपास सुरू आहे.
समाजात संताप
'डॉक्टरांना देवाचे दुसरे रूप मानले जाते', असे म्हटले जाते. मात्र, अशाच एका 'देवरूपी' डॉक्टराकडून रुग्णाचे शोषण झाल्याने परिसरात संतापाची लाट उसळली आहे. रुग्णालयासारख्या सुरक्षित ठिकाणी आणि स्वतःच्या पतीसमोरच असा प्रकार घडल्याने रुग्णांच्या सुरक्षेचा प्रश्न पुन्हा एकदा ऐरणीवर आला आहे.