Nashik Vidhan Parishad Election : महाराष्ट्र विधान परिषदेच्या नाशिक स्थानिक प्राधिकारी मतदारसंघाच्या निवडणुकीसाठी आज (गुरुवार) सकाळी ८ वाजेपासून मतदान प्रक्रियेला सुरुवात झाली. या मतदान प्रक्रियेत दुपारी १२ वाजेपर्यंत एकूण ९.८५ टक्के मतदान झाले आहे अशी माहिती निवडणूक निर्णय अधिकारी तथा जिल्हाधिकारी आयुष प्रसाद यांनी दिली.
तीन उमेदवार रिंगणात
या निवडणुकीत तीन उमेदवार रिंगणात असून जिल्ह्यातील नऊ मतदान केंद्रांवर मतदान सुरू आहे. दुपारी १२ वाजेपर्यंत ६१९ मतदारांपैकी ६१ जणांनी मतदानाचा हक्क बजावला. मतदान प्रक्रिया सुरळीत पार पडावी यासाठी सर्व केंद्रांवर कडेकोट पोलिस बंदोबस्त तैनात करण्यात आला आहे. दरम्यान, निवडणूक निरीक्षक मिलिंद शंभरकर यांनी सकाळी नाशिक आणि चांदवड तहसील कार्यालयातील मतदान केंद्रांना भेट देऊन पाहणी केली. यावेळी सार्वजनिक बांधकाम विभागाचे कार्यकारी अभियंता नवनाथ सोनवणे उपस्थित होते.
कुठे काय स्थिती ?
येवला : येवला येथील मतदान केंद्रावर दुपारी १२ वाजेपर्यंत केवळ एकच मतदान नोंदविण्यात आले. येवल्याचे नगराध्यक्ष राजेंद्र लोणारी यांनी सकाळीच मतदानाचा हक्क बजावला.
भगूर : दुपारी दीड वाजेच्या सुमारास भगूर येथील राष्ट्रवादी काँग्रेसचे नगरसेवक बसमधून जिल्हाधिकारी कार्यालयातील मतदान केंद्रावर दाखल झाले. त्यानंतर त्यांनी मतदान केले.
मतदानाची टक्केवारी अद्याप कमी असली तरी दुपारनंतर मतदानाचा वेग वाढण्याची शक्यता प्रशासनाकडून व्यक्त करण्यात येत आहे.