Nashik : सार्वजनिक ठिकाणी टवाळक्या करणे, उघड्यावर मद्यपान करून नागरिकांना त्रास देणे तसेच कायदा व सुव्यवस्थेला बाधा आणणाऱ्या प्रवृत्तींविरोधात अंबड पोलिसांनी विशेष मोहीम राबवून ७४ जणांवर प्रतिबंधात्मक कारवाई केली. या कारवाईमुळे नागरिकांनी समाधान व्यक्त केले आहे.
अंबड पोलीस ठाण्याचे वरिष्ठ पोलीस निरीक्षक जग्वेंद्रसिंग राजपूत यांच्या मार्गदर्शनाखाली चार अधिकारी व २२ पोलीस अंमलदारांच्या पथकाने अंबड पोलीस ठाण्याच्या हद्दीतील सिडको रुग्णालय परिसर, त्रिमूर्ती चौक, दत्त मंदिर चौक, माऊली लॉन्स परिसर तसेच विविध वाईन शॉपलगतच्या भागात तपासणी मोहीम राबविली. या ठिकाणी विनाकारण गर्दी करून बसणे, येणाऱ्या-जाणाऱ्या नागरिकांची छेड काढणे, सार्वजनिक ठिकाणी मद्यपान करणे तसेच संशयास्पद हालचाली करणाऱ्यांची कसून पडताळणी करण्यात आली.
या कारवाईदरम्यान ७४ जणांना ताब्यात घेऊन पोलीस ठाण्यात आणण्यात आले. त्यांच्यावर कायदेशीर प्रतिबंधात्मक कारवाई करण्यात आली. सार्वजनिक शांतता व सुव्यवस्था अबाधित राखण्यासाठी अशा मोहिमा सातत्याने राबविण्यात येणार असल्याचा इशारा पोलिसांनी दिला आहे. तसेच उघड्यावर मद्यपान, टवाळक्या किंवा नागरिकांच्या सुरक्षिततेला बाधा पोहोचविणारे कृत्य करणाऱ्यांविरुद्ध कठोर भूमिका घेतली जाईल, असेही स्पष्ट करण्यात आले.
