इस्लामाबाद : पाकिस्तानच्या (Pakisthan)अशांत खैबर पख्तुनख्वा प्रांतातील बन्नू जिल्ह्यात शनिवारी रस्त्याच्या कडेला झालेल्या दोन बॉम्बस्फोटांमध्ये किमान सात जण ठार आणि अनेकजण जखमी झाले, अशी माहिती पोलीस अधिकाऱ्यांनी दिली. या आत्मघाती हल्ल्याची जबाबदारी अद्याप कोणत्याही गटाने स्वीकारलेली नाही आणि सुरक्षा दलांनी परिसर सील करून तपास सुरू केला आहे.
पोलिसांच्या माहितीनुसार, पहिला आयईडी स्फोट एका प्रवासी व्हॅनला लक्ष्य करून करण्यात आला, ज्यात पाच जण जागीच ठार झाले. त्यानंतर लगेचच, त्याच ठिकाणी मदत आणि बचाव कार्यात गुंतलेल्या नागरिकांना लक्ष्य करून दुसरा स्फोट घडवण्यात आला, ज्यात आणखी दोन जण ठार झाले.हा स्फोट बन्नू जिल्ह्यातील मार्का बेरा परिसरात झाला. बन्नू जिल्हा पोलीस अधिकाऱ्यांच्या माहितीनुसार, रस्त्याच्या कडेला ठेवलेल्या एका स्फोटक उपकरणाचा (आयईडी) स्फोट होऊन एका प्रवासी व्हॅनला लक्ष्य करण्यात आले, ज्यामुळे पाच जणांचा जागीच मृत्यू झाला. त्यांनी सांगितले की, त्यानंतर थोड्याच वेळात त्याच ठिकाणी बचाव कर्मचाऱ्यांना लक्ष्य करून दुसरा स्फोट झाला. या स्फोटात दोन जणांचा मृत्यू झाला आणि एका वाहनाचे नुकसान झाले. डीपीओंनी सांगितले की, जखमींना आणि मृतांचे मृतदेह जवळच्या रुग्णालयात नेण्यात आले असून, तपास सुरू करण्यात आला आहे.
अधिकाऱ्यांच्या म्हणण्यानुसार, ज्या प्रवासी व्हॅनला लक्ष्य करण्यात आले होते, ती हाथी खेल गावातून बन्नू शहराकडे जात असताना स्फोटात सापडली. सुरक्षा दल आणि कायदा अंमलबजावणी यंत्रणांनी परिसर सील केला असून, स्फोटस्थळावरून पुरावे गोळा करण्यास सुरुवात केली आहे.पाकिस्तानचे राष्ट्राध्यक्ष आसिफ अली झरदारी यांनी या हल्ल्याचा तीव्र शब्दांत निषेध केला आणि निष्पाप नागरिकांच्या जीवितहानीबद्दल तीव्र दुःख व्यक्त केले. त्यांनी मृतांच्या कुटुंबीयांप्रति शोक व्यक्त केला आणि जखमींना लवकरात लवकर बरे वाटावे यासाठी सदिच्छा व्यक्त केल्या. दहशतवाद्यांना पाठिंबा, आश्रय आणि आर्थिक मदत देणाऱ्यांवरही कारवाई करणे आवश्यक आहे, असे राष्ट्रपती म्हणाले. पंतप्रधान शाहबाज शरीफ यांनीही या घटनेचा निषेध केला आणि मृतांबद्दल शोक व्यक्त केला. राष्ट्रीय सभेचे अध्यक्ष अयाज सादिक म्हणाले की, निष्पाप नागरिकांना लक्ष्य करणे हे एक भ्याड आणि लज्जास्पद कृत्य आहे.