FIFA World Cup 2026 मध्ये नॉर्वे (Norway) संघाच्या कामगिरीइतकीच त्यांच्या 'वायकिंग रो' (Viking Row) सेलिब्रेशनची चर्चा रंगली आहे. विश्वचषकातील (World Cup) सर्वाधिक व्हायरल (Viral) ट्रेंडपैकी एक ठरलेल्या या अनोख्या सेलिब्रेशनने फुटबॉल चाहत्यांचे (Football Fans) लक्ष वेधून घेतले आहे.
सेनेगलविरुद्ध (Senegal) ३-२ अशा रोमांचक विजयासह नॉर्वेने बाद फेरीत (Knockout Stage) प्रवेश केला. सामन्यानंतर कर्णधार मार्टिन ओडेगार्ड (Martin Odegaard) आणि स्टार स्ट्रायकर एर्लिंग हालांड (Erling Haaland) यांच्या नेतृत्वाखाली संपूर्ण संघ मैदानावर बसला आणि 'वायकिंग रो' सेलिब्रेशन करत चाहत्यांसोबत आनंद साजरा केला.
काय आहे 'वायकिंग रो' सेलिब्रेशन?
'वायकिंग रो' हे नॉर्वेच्या ऐतिहासिक वायकिंग (Viking) परंपरेतून प्रेरित सेलिब्रेशन आहे. वायकिंग युग (Viking Age) साधारणपणे इ.स. ७०० ते ११०० या काळात होते. त्या काळातील नॉर्वे, स्वीडन आणि डेन्मार्कमधील वायकिंग योद्धे लांब नौकांमधून (Longboat) समुद्र प्रवास करत विविध देशांमध्ये व्यापार आणि मोहिमा राबवत असत. या सेलिब्रेशनमध्ये खेळाडू आणि चाहते नौका चालवण्याच्या (Rowing) हालचालींची नक्कल करतात. हे वायकिंगांच्या समुद्री प्रवासाचे प्रतीक मानले जाते आणि नॉर्वेच्या सांस्कृतिक ओळखीचा महत्त्वाचा भाग आहे.
न्यूयॉर्कपासून ओस्लोपर्यंत 'वायकिंग रो'ची क्रेझ
नॉर्वेचे चाहते केवळ स्टेडियममध्येच नव्हे तर एस्कलेटरवर (Escalator), सार्वजनिक ठिकाणी आणि अमेरिकेतील प्रसिद्ध टाइम्स स्क्वेअर (Times Square) येथेही 'वायकिंग रो' करताना दिसले. त्यामुळे हे सेलिब्रेशन जागतिक स्तरावर लोकप्रिय झाले आहे.
मिडफिल्डर पॅट्रिक बर्ग (Patrick Berg) म्हणाला, "सुरुवातीला हे सेलिब्रेशन किती लोकप्रिय होईल याबाबत शंका होती. पण आता ते आमच्या विश्वचषक मोहिमेचा मोठा भाग बनले आहे. आज संपूर्ण जगाला 'वायकिंग रो'ची माहिती झाली आहे."
तर स्ट्रायकर अलेक्झांडर सॉरलोथ (Alexander Sorloth) म्हणाला, "हे सेलिब्रेशन करण्याचा अनुभव खूपच आनंददायी आहे. चाहत्यांचा आवाज आणि वातावरण खरोखरच जादुई वाटते." सध्या नॉर्वे गटात (Group) सहा गुणांसह दुसऱ्या स्थानावर आहे. गोलफरकामुळे फ्रान्स (France) अव्वल स्थानावर असून दोन्ही संघांचा अंतिम साखळी सामना (Group Stage Match) शुक्रवारी रंगणार आहे.