दुबई : भारतीय यष्टिरक्षक-फलंदाज इशान किशनने आयसीसीच्या ताज्या पुरुष टी-२० फलंदाजी क्रमवारीत अव्वल स्थान पटकावले असून, त्याने सहकारी अभिषेक शर्माला मागे टाकले आहे. बुधवारी जाहीर झालेल्या या क्रमवारीत किशन ८७६ गुणांसह पहिल्या क्रमांकावर पोहोचला आहे. वर्षाच्या सुरुवातीला झालेल्या टी-२० विश्वचषकात किशनने ३१७ धावा करत सातत्यपूर्ण कामगिरी केली होती. त्याचा स्ट्राईक रेट २०० च्या जवळ होता, ज्यामध्ये कोलंबो येथे पाकिस्तानविरुद्ध केलेल्या 'सामनावीर' कामगिरीचाही समावेश आहे. या यशासह विराट कोहली, सूर्यकुमार यादव आणि अभिषेक शर्मा यांच्यानंतर टी-२० क्रमवारीत अव्वल स्थानी पोहोचणारा तो चौथा भारतीय पुरुष फलंदाज ठरला आहे. मागील १२ महिने अभिषेक शर्मा (८६९ गुण) या यादीत अव्वल स्थानी होता, मात्र आता तो दुसऱ्या क्रमांकावर घसरला आहे. पाकिस्तानचा साहिबजादा फरहान ८४८ गुणांसह तिसऱ्या स्थानावर आहे.
भारताचा नवनियुक्त उपकर्णधार टिळक वर्मा (७४७ गुण) सहाव्या क्रमांकावर कायम आहे, तर माजी कर्णधार सूर्यकुमार यादव एका स्थानाने घसरून आठव्या क्रमांकावर आला आहे. वरुण चक्रवर्ती आणि जसप्रीत बुमराह यांनी प्रत्येकी एक स्थान गमावले असून, ते अनुक्रमे तिसऱ्या आणि सहाव्या क्रमांकावर आहेत. अफगाणिस्तानचा राशिद खान गोलंदाजीच्या क्रमवारीत अव्वल स्थानी कायम आहे.
कसोटी फलंदाजीच्या क्रमवारीत ऑस्ट्रेलियाचा ट्रॅव्हिस हेडने अव्वल स्थान पटकावले आहे, तर जो रूट तिसऱ्या क्रमांकावर घसरला आहे. भारताचा कसोटी कर्णधार शुभमन गिल एका स्थानाने प्रगती करत सहाव्या क्रमांकावर पोहोचला आहे, तर यशस्वी जैस्वाल एका स्थानाने घसरून नवव्या क्रमांकावर आला आहे. कसोटी गोलंदाजीच्या क्रमवारीत भारताचा जसप्रीत बुमराह अव्वल स्थानी कायम आहे.