Hardik Pandya : आयपीएल २०२७ पूर्वी मोठ्या ट्रेडची चर्चा! हार्दिक पांड्या CSK किंवा KKRमध्ये जाणार? सोशल मीडियावर खळबळ

मुंबई : आयपीएल २०२७ च्या आधी भारतीय क्रिकेटमधील स्टार अष्टपैलू खेळाडू हार्दिक पांड्या (Hardik Pandya) पुन्हा एकदा मोठ्या ट्रेड चर्चेच्या केंद्रस्थानी आला आहे. सोशल मीडिया आणि विविध अहवालांनुसार मुंबई इंडियन्स (MI) आपल्या कर्णधाराला चेन्नई सुपर किंग्स (CSK) किंवा कोलकाता नाईट रायडर्स (KKR) कडे ट्रेड करण्याचा विचार करत असल्याचे दावे केले जात आहेत. मात्र, या सर्व चर्चांना अद्याप कोणतीही अधिकृत पुष्टी मिळालेली नाही.

CSK कडून हार्दिकसाठी रस?

चर्चेनुसार, चेन्नई सुपर किंग्स हार्दिक पांड्याला (Hardik Pandya) संघात सामील करण्यास उत्सुक असल्याचे बोलले जात आहे. महेंद्रसिंग धोनीच्या मार्गदर्शनाखाली खेळण्याची संधी ही त्याच्यासाठी आकर्षक ठरू शकते, अशीही चर्चा रंगली आहे. सध्या CSKचे नेतृत्व ऋतुराज गायकवाड करत असून, हार्दिक आल्यास नेतृत्वात बदल होईल का, हा मोठा प्रश्न उपस्थित केला जात आहे.

आयुष म्हात्रे आणि खलील अहमदच्या बदल्यात ट्रेड?

काही अहवालांमध्ये असा दावा करण्यात आला आहे की, मुंबई इंडियन्सने हार्दिक पांड्याच्या (Hardik Pandya) बदल्यात CSKकडे दोन खेळाडूंची मागणी केली आहे. यात डावखुरा वेगवान गोलंदाज खलील अहमद आणि १८ वर्षीय युवा फलंदाज आयुष म्हात्रे यांचा समावेश असल्याचे म्हटले जात आहे. हा ट्रेड झाला तर मुंबईला भविष्यातील युवा प्रतिभा आणि अनुभवी गोलंदाज मिळू शकतो, तर CSKला एक अनुभवी अष्टपैलू मिळेल.

KKRही शर्यतीत?

हार्दिक पांड्याच्या (Hardik Pandya) ट्रेडमध्ये कोलकाता नाईट रायडर्स (KKR) देखील रस दाखवत असल्याची चर्चा आहे. KKR हार्दिकला थेट कर्णधार बनवू शकते, असा दावा काही अहवालांमध्ये करण्यात आला आहे. त्यासाठी मुंबईने रिंकू सिंग आणि वरुण चक्रवर्ती यांची मागणी केल्याचेही सांगितले जात आहे. मात्र, हे दोन्ही खेळाडू KKRसाठी अत्यंत महत्त्वाचे असल्याने हा ट्रेड प्रत्यक्षात येणे कठीण मानले जात आहे.

इतर फ्रँचायझींचीही नजर :

चर्चांनुसार, सनरायझर्स हैदराबाद आणि रॉयल चॅलेंजर्स बंगळुरू वगळता बहुतांश आयपीएल फ्रँचायझी हार्दिक पांड्याला (Hardik Pandya) आपल्या संघात आणण्यास उत्सुक असल्याचे म्हटले जात आहे. त्याचा अनुभव, आक्रमक फलंदाजी आणि नेतृत्वक्षमता यामुळे तो कोणत्याही संघासाठी मोठी ताकद ठरू शकतो. सध्या मात्र मुंबई इंडियन्स, CSK, KKR किंवा आयपीएल प्रशासनाकडून या ट्रेडबाबत कोणतीही अधिकृत घोषणा करण्यात आलेली नाही. त्यामुळे हे सर्व दावे केवळ चर्चेच्या पातळीवरच आहेत.