पुणे : पुण्यातील लोहगड किल्ल्यावर केतन अग्रवाल (Ketan Agrawal) यांच्या हत्याप्रकरणात तपासादरम्यान नवा धक्कादायक तपशील समोर आला आहे. या प्रकरणातील मुख्य संशयित सिया गोयल (Siya Goyal) आणि चेतन चौधरी (Chetan Chaudhary) यांनी चार महिन्यांपूर्वीच गुप्तपणे विवाह केल्याचा संशय पोलिसांनी व्यक्त केला आहे. हा दावा दोघांच्या मोबाईलमधील व्हॉट्सअॅप चॅटच्या तपासातून समोर आल्याची माहिती सूत्रांनी दिली आहे.
१८ जून रोजी लोहगड किल्ल्यावरून खाली ढकलून केतन अग्रवाल यांची हत्या झाल्याचा आरोप आहे. या प्रकरणात सिया गोयल आणि तिचा कथित प्रियकर चेतन चौधरी यांना पोलिसांनी अटक केली असून त्यांच्या मोबाईल फोनमधील डिजिटल पुराव्यांची तपासणी सुरू आहे.
तपासादरम्यान मिळालेल्या व्हॉट्सअॅप चॅटमधून दोघांनी चार महिन्यांपूर्वीच विवाह केल्याचे संकेत मिळाल्याचा दावा तपास यंत्रणांनी केला आहे. या माहितीची पडताळणी करण्यासाठी पोलिसांकडून अधिक तपास सुरू आहे.
मृत केतन अग्रवाल आणि सिया गोयल यांचा विवाह ठरला होता. मात्र, सियाचे चेतन चौधरीसोबत प्रेमसंबंध असल्याचा संशय आधीपासून व्यक्त केला जात होता. पोलिसांच्या प्राथमिक तपासानुसार, हे संबंध आणि कथित गुप्त विवाह लपवण्यासाठी केतनला मार्गातून हटवण्याचा कट रचण्यात आला असावा, या शक्यतेने तपास सुरू आहे.
दरम्यान, पोलिसांकडून डिजिटल पुरावे, चॅट्स आणि इतर तांत्रिक माहितीच्या आधारे या प्रकरणाचा सखोल तपास सुरू असून, अधिकृत निष्कर्ष तपास पूर्ण झाल्यानंतरच स्पष्ट होणार आहेत.