पुणे : पुणे जिल्ह्यातील मावळ (Maval) तालुक्यात मुसळधार पावसामुळे मोठी दुर्घटना घडली आहे. विसापूर किल्ल्याच्या पायथ्याशी असलेल्या पाटण गावात पहाटे दरड कोसळून एका कुटुंबाचे घर मातीच्या ढिगाऱ्याखाली गाडले गेले. या घटनेनंतर परिसरात एकच खळबळ उडाली असून बचावकार्य युद्धपातळीवर सुरू आहे. (Pune Landslide)
http://prahaar.in/2026/07/09/inquiry-into-unauthorized-constructions-in-the-eco-sensitive-zones-of-mahabaleshwar-and-matheran/
प्राथमिक माहितीनुसार, पहाटेच्या सुमारास दरड कोसळल्यानंतर घरातील सदस्य अडकल्याची माहिती मिळताच स्थानिक नागरिक, महसूल प्रशासन आणि आपत्ती व्यवस्थापन यंत्रणा तातडीने घटनास्थळी दाखल झाली. त्यानंतर राष्ट्रीय आपत्ती प्रतिसाद दल (NDRF), लष्कर, अग्निशमन दल आणि स्थानिक प्रशासनाने संयुक्तपणे बचाव मोहीम सुरू केली. (Pune Disaster)
बचाव पथकांनी आतापर्यंत 9 जणांना सुरक्षित बाहेर काढण्यात यश मिळवले आहे. मात्र, आणखी ८ ते ९ जण ढिगाऱ्याखाली अडकले असण्याची शक्यता व्यक्त करण्यात येत असून त्यांचा शोध सुरू आहे. जेसीबी आणि अत्याधुनिक बचाव उपकरणांच्या मदतीने मातीचा ढिगारा हटविण्याचे काम सुरू आहे.
स्थानिकांच्या माहितीनुसार, पहाटे अचानक मोठा आवाज झाला आणि काही क्षणांतच संपूर्ण घर मातीखाली गाडले गेले. सततच्या मुसळधार पावसामुळे परिसरातील डोंगरभाग अस्थिर झाल्याने ही दुर्घटना घडल्याचा प्राथमिक अंदाज व्यक्त करण्यात येत आहे.
जिल्हा प्रशासनाने नागरिकांना डोंगरपायथ्याच्या आणि दरडप्रवण भागात सतर्क राहण्याचे आवाहन केले असून, परिस्थितीवर सातत्याने लक्ष ठेवण्यात येत आहे. बचावकार्य पूर्ण होईपर्यंत अधिकृत माहितीचीच दखल घ्यावी, असे प्रशासनाने स्पष्ट केले आहे.