Kiara Advani : बॉलिवूडची लोकप्रिय अभिनेत्री कियारा अडवाणी (Kiara Advani) अनेकांच्या मनावर राज्य करते. कबीर सिंग चित्रपटानंतर (kabir singh movie) कियारा अडवाणी आणखी प्रकाशझोतात आली होती. त्यांनतर ती चर्चेत होती. सध्या कियारा तिच्या आगामी 'टॉक्सिक' (Toxic) या चित्रपटामुळे चर्चेत आहे. कन्नड सुपरस्टार यश मुख्य भूमिकेत असलेल्या या पीरियड गँगस्टर चित्रपटाची प्रेक्षक आतुरतेने वाट पाहत आहेत. या चित्रपटात कियारा 'नादिया' ही भूमिका साकारत आहे. आता या चित्रपटासाठी कियाराच्या मानधनाबाबत मोठा खुलासा झाला आहे.
सर्वाधिक मानधन घेणाऱ्या अभिनेत्रींच्या यादीत कियारा
123 तेलुगूच्या अहवालानुसार, कियाराने 'टॉक्सिक'साठी विक्रमी मानधन घेतले असून तिला या चित्रपटासाठी तब्बल १५ कोटी रुपये मिळाले आहेत. हे मानधन तिच्या आतापर्यंतच्या कारकिर्दीतील सर्वाधिक असल्याचे सांगितले जात आहे. यासोबतच कियाराचा देशातील सर्वाधिक मानधन घेणाऱ्या अभिनेत्रींच्या यादीतही समावेश झाला आहे. दरम्यान, नुकतेच 'टॉक्सिक'मधील पहिले गाणे 'तबाही' प्रदर्शित झाले आहे. या गाण्यात यश आणि कियारा यांची दमदार केमिस्ट्री पाहायला मिळत असून कियारा अत्यंत ग्लॅमरस अंदाजात झळकली आहे. हे गाणे सध्या सोशल मीडियावर चांगलेच गाजत आहे.
'टॉक्सिक' मध्ये हे कलाकार
'टॉक्सिक' या चित्रपटात नयनतारा (Nayantara), हुमा कुरेशी (Huma Qureshi) , तारा सुतारिया (Tara Sutaria) आणि रुक्मिणी वसंत (Rukmini Vasant) यांच्याही महत्त्वाच्या भूमिका आहेत. गीतू मोहनदास यांनी या चित्रपटाचे दिग्दर्शन केले असून, यश आणि गीतू मोहनदास यांनी मिळून चित्रपटाची कथा लिहिली आहे. यश या चित्रपटाचे निर्मातेही आहेत. हा चित्रपट २६ ऑगस्ट २०२६ रोजी चित्रपटगृहांत प्रदर्शित होणार आहे.
चित्रपटांसाठी अभिनेत्री किती मानधन घेतात ?
सर्वाधिक मानधन घेणाऱ्या अभिनेत्रींबाबत बोलायचे झाल्यास, IMDbनुसार प्रियांका चोप्रा जोनास (priyanka chopra jonas) एका चित्रपटासाठी सुमारे १८ ते ३० कोटी रुपये मानधन घेते. तर दीपिका पदुकोण (Deepika Padukone) १५ ते ३० कोटी, कंगना रणौत १५ ते २७ कोटी, आलिया भट्ट १० ते २० कोटी आणि करीना कपूर ८ ते १८ कोटी रुपये मानधन आकारत असल्याचे सांगितले जाते.