मुंबई : व्हॉट्सअ‍ॅपने मुंबईत आयोजित वार्षिक बिझनेस समिट २०२६मध्ये व्यवसायांसाठी महत्त्वपूर्ण घोषणा करत ‘मेटा बिजनेस एजंट एआय’ सादर केले. या नव्या एआय-आधारित सुविधेमुळे व्यवसायांना २४ तास, सातही दिवस ग्राहकांशी संवाद साधणे, चौकशींची उत्तरे देणे आणि विक्री प्रक्रियेला गती देणे शक्य होणार आहे. यासोबतच मोठ्या उद्योगांसाठी ‘मेटा बिजनेस एजंट प्लॅटफॉर्म’ ही उपलब्ध करून देण्यात आला आहे.
मेटा बिजनेस एजंट हा कृत्रिम बुद्धिमत्तेवर आधारित व्हर्च्युअल सहाय्यक असून तो ग्राहकांच्या प्रश्नांना तत्काळ उत्तरे देणे, उत्पादनांची शिफारस करणे, अपॉइंटमेंट बुक करणे, संभाव्य ग्राहकांची प्राथमिक माहिती तपासणे तसेच विक्री पूर्ण होईपर्यंत मदत करणे अशी अनेक कामे स्वयंचलितपणे करू शकतो. आवश्यकतेनुसार कोणत्या टप्प्यावर मानवी प्रतिनिधीने संवादात सहभागी व्हावे, यावरही व्यवसाय मालकांचे नियंत्रण राहणार आहे. ग्राहकांशी संवाद साधण्याबरोबरच हा एआय व्यवसाय मालकांसाठी विश्लेषक म्हणूनही काम करणार आहे. मोठ्या उद्योगांसाठी सादर करण्यात आलेला मेटा बिजनेस एजंट प्लॅटफॉर्म व्यवसायांना स्वतःचे एआय एजंट तयार करण्याची, त्यांना आवश्यकतेनुसार कस्टमाइझ करण्याची आणि मोठ्या प्रमाणावर वापरण्याची सुविधा देणार आहे.
मेटाचे भारतातील व्यवस्थापकीय संचालक आणि कंट्री हेड अरुण श्रीनिवास यांनी सांगितले की, भारत हा संभाषण-आधारित व्यवसायासाठी जगातील सर्वात वेगाने विकसित होणारा बाजार आहे. ग्राहकांशी अधिक प्रभावी नाते निर्माण करणे, व्यवसायाची कार्यक्षमता वाढवणे आणि नव्या संधी उपलब्ध करून देण्यासाठी एआय महत्त्वाची भूमिका बजावणार असल्याचे त्यांनी नमूद केले. स्वीगी, मधुलिका एंटरप्रायझेस आणि कायझेन अ‍ॅडव्हेंचर्स यांसारख्या कंपन्यांनी या एआय प्लॅटफॉर्मचा वापर सुरू केला असून ग्राहक प्रतिसादाचा वेग वाढणे, चौकशीचे व्यवसायात रूपांतर होण्याचे प्रमाण सुधारणे आणि कर्मचाऱ्यांवरील कामाचा ताण कमी होणे असे सकारात्मक परिणाम दिसून आल्याचा दावा कंपन्यांनी केला आहे