Dhule crime : धुळे शहरातील चोरीच्या घटनेनं पोलिसांनाही चक्रावून सोडले आहे. पश्चिम देवपूर पोलीस ठाण्यात (West Deopur Police Station) वलवाडी परिसरात असलेल्या एका घरातून पाच लाख साठ हजार रुपये किमतीचे सोन्याचे दागिने चोरी झाल्याची तक्रार एका महिलेने दाखल केली होती. मात्र पोलीस तपासात धक्कादायक माहिती उघड झाली आहे. तक्रर करणाऱ्या महिलेने आईचे सोने हडप करण्यासाठी खोटी तक्रार देऊन पोलिसांची दिशाभूल केल्याचा प्रकार तपासात उघड झाला आहे. पोलिसांनी तक्रारदार महिलेला अटक केली असून तिच्या ताब्यातून सोने जप्त केले आहे.
नेमकं प्रकरण काय ?
ही संपूर्ण घटना धुळ्यातील वलवाडी शहरातील सुंदर नगर मधील प्लॉट क्रमांक सात येथे घडली आहे. येथे राहणाऱ्या सोनल भास्कर बागले यांनी चोरी झाल्याची फिर्याद पश्चिम देवपूर पोलीस ठाण्यात (West Deopur Police Station) दिली होती. त्यांच्या घरातून आई कस्तुरीबाई यांचे सोन्याचे मंगळसुत्र माळ, सोन्याची छोटी माळ, सोन्याच्या 2 बांगडया व सोन्याची पोत असा एकुण 5 लाख 60 हजार रु. किं.चे 90.30 ग्रॅम सोन्याचे दागिने चोरुन नेल्याने भारतीय न्याय संहिता क. 305 (1) प्रमाणे घरफोडीचा गुन्हा दाखल करण्यात आला होता.
घटनेचे गांभीर्य लक्षात घेता पश्चिम देवपूर पोलीस ठाण्याचे (West Deopur Police Station) सहाय्यक पोलीस निरीक्षक जिभाऊ पाटील (Jibhau Patil) यांनी या घटनेचा तपास सुरू केला. परिस्थितीजन्य पुरावे, साक्षीदार, फिर्यादी यांनी दिलेली फिर्याद आणि तपासात त्यांच्याकडे करण्यात येत असलेली विचारपुस यातील विसंगती आणि वारंवार फिर्यादी यांच्यावर पोलिसांचा संशय बळावत होता. त्यामुळे त्यांनी फिर्यादी सोनल भास्कर बागले यांच्याकडे सखोल विचारपुस केली. पोलिसांनी प्रश्नांची सरबत्ती केल्यांनतर अखेर तिने गुन्हयाची कबुली दिली.
मुलीनेच केली आईच्या दागिन्यांची चोरी
दरम्यान, गुन्ह्यात चोरी केलेले सोन्याचे दागिने काढून दिल्याने हे दागिने पोलिसांनी हस्तगत केले आहेत. अशाप्रकारे फिर्यादी मुलीनेच आईचे सोने चोरीचा बनाव केल्याचं तपासात निष्पन्न झाले असून महिला आरोपीकडुन एकूण 5, लाख 60 हजार रु. किं.चे 90.30 ग्रॅम सोन्याचे दागिने हस्तगत करुन पश्चिम देवपूर पोलीस ठाणे (West Deopur Police Station) मधील घरफोडीचा गुन्हा उघड करण्यात आला आहे.