मुंबई : सिंधुदुर्ग ग्लोबल इंडस्ट्रियल रिजन (SGIR) प्रकल्पाच्या विकासासाठी कृती आराखड्याला वेग देण्याच्या दृष्टीने मत्स्यव्यवसाय आणि बंदरे मंत्री नितेश राणे यांच्या उपस्थितीत आढावा बैठक पार पडली. या बैठकीत प्रकल्पाची संकल्पना, विकास आराखडा आणि पुढील अंमलबजावणीच्या टप्प्यांवर सविस्तर चर्चा करण्यात आली. ( Sindhudurg Global Industrial Region)
बैठकीला सिंधुदुर्गच्या जिल्हाधिकारी तृप्ती धोडमिसे दूरदृश्य प्रणालीद्वारे सहभागी झाल्या. तसेच प्रकल्पाशी संबंधित तांत्रिक पथकातील अधिकारी आणि प्रतिनिधी उपस्थित होते. (Nitesh Rane)
बैठकीत सिंधुदुर्गमध्ये औद्योगिक विकासासोबतच पर्यटन, शिक्षण आणि सामाजिक सुविधांचा समतोल राखणारी आधुनिक विकास व्यवस्था उभारण्यावर भर देण्यात आला. औद्योगिक क्षेत्रासोबत आवश्यक सामाजिक आणि संस्थात्मक पायाभूत सुविधा निर्माण करून संपूर्ण विकासाची परिसंस्था उभी करण्याचे नियोजन करण्यात येत असल्याची माहिती सादरीकरणात देण्यात आली. (Sindhudurg News)
उपलब्ध नैसर्गिक आणि औद्योगिक संसाधनांचा प्रभावी वापर करून विविध उद्योगांना चालना देण्याचा आराखडा तयार करण्यात आला आहे. त्याचबरोबर आधुनिक उत्पादन क्षेत्र विकसित करणे, तसेच 'युथ सिटी' संकल्पनेअंतर्गत शिक्षण, क्रीडा, पर्यटन आणि आधुनिक नागरी सुविधा विकसित करण्यावरही भर देण्यात आला. (Maharashtra Government)
प्रकल्पाच्या अंमलबजावणीसाठी आवश्यक प्रशासकीय प्रक्रिया, विविध विभागांमधील समन्वय आणि पुढील टप्प्यातील कार्यवाहीबाबतही बैठकीत आढावा घेण्यात आला. ( Industrial Development)
यावेळी नितेश राणे यांनी सांगितले की, या प्रकल्पाच्या माध्यमातून सिंधुदुर्गमध्ये मोठ्या प्रमाणावर गुंतवणूक आकर्षित करण्याबरोबरच रोजगाराच्या नवीन संधी निर्माण करण्यावर भर दिला जाणार आहे. उद्योग, पर्यटन आणि आधुनिक पायाभूत सुविधांचा समन्वित विकास करून सिंधुदुर्गला शाश्वत आर्थिक विकासाचे नवे केंद्र बनविण्याच्या दिशेने नियोजनबद्ध पद्धतीने काम केले जाणार आहे. (Marathi News)