पुणे : पुणे (Pune) जिल्ह्यातील जुन्नर तालुक्यात असलेल्या नाणेघाट येथे पर्यटनासाठी गेलेल्या 22 वर्षीय युवकाचा खोल दरीत पडून मृत्यू झाल्याची दुर्दैवी घटना घडली आहे. सलग दोन दिवस सुरू असलेल्या शोधमोहिमेनंतर आज सकाळी बचाव पथकाला युवकाचा मृतदेह दरीत आढळून आला. खराब हवामान आणि दुर्गम परिसरामुळे बचावकार्य मोठे आव्हान ठरले होते. (Naneghat)
मृत युवकाची ओळख दत्ता विनायक लोंढे (वय 22) अशी झाली असून तो आंबेगाव तालुक्यातील पारगाव शिंगवे गावचा रहिवासी होता. दत्ता आपल्या तीन मित्रांसह नाणेघाट परिसरात फिरण्यासाठी गेला होता. रविवारी सकाळी दाट धुक्यामुळे परिसरातील दृश्यता कमी झाली असताना कड्याजवळ फिरताना त्याचा तोल गेला आणि तो खोल दरीत कोसळल्याची माहिती समोर आली आहे. (Pune News)
घटनेची माहिती मिळताच पोलीस, स्थानिक ग्रामस्थ आणि बचाव पथकाने शोधमोहीम सुरू केली. मात्र मुसळधार पाऊस, घसरडे कडे आणि दाट धुके यामुळे शोधकार्याला अनेक अडचणींचा सामना करावा लागला. दरम्यान, पोलिसांनी युवकाच्या मोबाईलचे लोकेशन तपासले. मोबाईलवर रिंग जात असल्याने तो दरीतच असल्याचा अंदाज व्यक्त करण्यात आला. त्यानुसार ठाणे जिल्ह्याच्या ग्रामीण भागाच्या दिशेने शोधमोहीम वाढवण्यात आली. (Rescue Opration)
सोमवारी अधिकृत रेस्क्यू टीम घटनास्थळी दाखल झाल्यानंतर शोधकार्याला वेग आला. अखेर आज सकाळी दरीत युवकाचा मृतदेह आढळून आला. त्यानंतर मृतदेह बाहेर काढून शवविच्छेदनासाठी पाठवण्यात आला असून पुढील कायदेशीर प्रक्रिया सुरू आहे. (Naneghat Accident)
पावसाळ्यात नाणेघाट येथे मोठ्या संख्येने पर्यटक भेट देतात. मात्र या काळात दाट धुके, निसरडे कडे आणि खोल दऱ्यांमुळे अपघाताचा धोका वाढतो. त्यामुळे पर्यटकांनी धोकादायक ठिकाणी जाणे टाळावे, सेल्फी काढताना किंवा साहसी प्रकार करताना खबरदारी घ्यावी आणि प्रशासनाच्या सूचनांचे पालन करावे, असे आवाहन करण्यात आले आहे. (Pune News)