मुंबई : बिग बॅश लीग म्हणून ओळखली जाणारी ऑस्ट्रेलियन टी२० लीग भारतात प्रथमच आयोजित केली जाणार आहे. २०२६-२७ हंगामाचा उद्घाटनाचा सामना १२ डिसेंबर २०२६ रोजी चेन्नई येथील एम. ए. चिदंबरम स्टेडियम (चेपॉक) येथे होणार असून, त्यात मेलबर्न रेनेगेड्स विरुद्ध गतविजेते पर्थ स्कॉचर्स यांच्यात सामना होईल. क्रिकेट ऑस्ट्रेलियाने बिग बॅश लीग भारतात आणण्याच्या निर्णयानंतर, ही संघटना भारतात एका ऐतिहासिक ॲशेस कसोटी सामन्याचे आयोजन करण्याची तयारीही करत आहे. क्रिकेट ऑस्ट्रेलियाचे सीईओ टॉड ग्रीनबर्ग यांनी सांगितले की, ॲशेस मालिकेच्या १५० व्या वर्धापन दिनानिमित्त हा कसोटी सामना आयोजित करण्याचा विचार केला जात आहे. (Ashes In India)
इंग्लंड विरुद्ध ऑस्ट्रेलिया ॲशेस भारतात होणार ?
ॲशेसच्या १५० व्या वर्धापन दिनानिमित्त पुढील वर्षी मार्चमध्ये ऑस्ट्रेलिया आणि इंग्लंड यांच्यात पाच सामन्यांची ऐतिहासिक कसोटी मालिका आयोजित करण्यात येणार आहे. सध्या ही ऐतिहासिक मालिका ऑस्ट्रेलियाबाहेर आयोजित करण्याची कोणतीही योजना नसली तरी, भविष्यात ती भारतात आयोजित करण्याची शक्यता आहे, असे ग्रीनबर्ग यांनी नमूद केले. क्रिकेट ऑस्ट्रेलिया सध्या भारतातील आपली उपस्थिती वाढवण्यावर लक्ष केंद्रित करत आहे. या प्रयत्नाचा एक भाग म्हणून, या डिसेंबरमध्ये चेन्नई येथे बिग बॅश लीगचा पहिला सामना आयोजित केला जात आहे. या सामन्यात मेलबर्न रेनेगेड्स विरुद्ध पर्थ स्कॉचर्स असा सामना होईल, ज्याचा उद्देश भारतीय चाहत्यांना ऑस्ट्रेलियन क्रिकेटचा प्रत्यक्ष अनुभव देणे हा आहे. भारतात ॲशेस कसोटी आयोजित करण्याची कल्पना ही भारतीय क्रिकेट बाजारपेठेच्या व्यावसायिक ताकदीचे प्रतीक मानलं जात आहे. भारतात क्रिकेटचा सर्वात मोठा चाहतावर्ग असल्याने, ऑस्ट्रेलिया-इंग्लंड या प्रतिष्ठित सामन्याचे आयोजन केल्यास मोठ्या प्रमाणात प्रेक्षक आकर्षित होतील आणि नव्या व्यावसायिक संधी निर्माण होतील, असे ग्रीनबर्ग यांनी सांगितले.(Ashes In India)
ॲशेस २०२६-२०२७ वेळापत्रक
पहिली कसोटी: १८–२२ जून, ट्रेंट ब्रिज (नॉटिंगहॅम)
दुसरी कसोटी: ३० जून–४ जुलै, लॉर्ड्स (लंडन)
तिसरी कसोटी: ८–१२ जुलै, एजबॅस्टन (बर्मिंगहॅम)
चौथी कसोटी: २१–२५ जुलै, युटिलिटा बाऊल (साउथहॅम्पटन)
पाचवी कसोटी: २९ जुलै–२ ऑगस्ट, द ओव्हल (लंडन)