मिळालेल्या माहितीनुसार, संबंधित अल्पवयीन मुलगी 14 जुलैपासून बेपत्ता होती. तिच्या नातेवाईकांनी एका सीसीटीव्ही फुटेजचा आधार घेत मुलगी रिजवान नावाच्या तरुणासोबत जाताना दिसत असल्याचा दावा केला आहे. हे फुटेज पोलिसांनी नव्हे, तर स्वतः त्यांनी शोधून पोलिसांकडे दिल्याचे नातेवाईकांचे म्हणणे आहे. (Virar Missing Girl)
नातेवाईकांच्या आरोपानुसार, अनेक दिवस पोलीस ठाण्यात पाठपुरावा करूनही अपेक्षित कारवाई झाली नाही. त्यानंतर काही हिंदू संघटनांनी स्वतंत्रपणे माहिती गोळा करण्यास सुरुवात केली. एका सलून चालकाकडून माहिती मिळाल्यानंतर संबंधित तरुणाशी संपर्क साधण्यात आला. त्यानंतर मुलगी एका महिलेसोबत आढळल्याचा दावा करण्यात आला. संबंधित महिला आणि सलून चालकाला पोलिसांच्या ताब्यात देण्यात आले होते. मात्र, चौकशीनंतर दोघांनाही सोडून देण्यात आल्याचा आरोप नातेवाईकांनी केला आहे. तसेच मुलीच्या वैद्यकीय तपासणीसही विलंब झाल्याचे त्यांनी म्हटले आहे. (Palghar)
दुसरीकडे, विरार पोलिसांनी या सर्व आरोपांचे खंडन केले आहे. पोलिसांच्या म्हणण्यानुसार, प्राथमिक तपासात मुलगी कौटुंबिक कारणांमुळे स्वतःहून घराबाहेर गेल्याचे समोर आले आहे. या प्रकरणात कोणताही आरोपी नसून 'लव्ह जिहाद'चा कोणताही संबंध आढळलेला नाही. तसेच सरकारी रुग्णालयात स्त्रीरोगतज्ज्ञ उपलब्ध नसल्यामुळे वैद्यकीय तपासणीला विलंब झाल्याचेही पोलिसांनी स्पष्ट केले आहे. (Virar Police Station)
या प्रकरणात नातेवाईक आणि काही संघटनांकडून गंभीर आरोप करण्यात आले असले, तरी पोलिसांनी त्यास नकार दिला आहे. त्यामुळे या प्रकरणातील नेमकी वस्तुस्थिती पुढील तपास आणि अधिकृत निष्कर्षानंतरच स्पष्ट होणार आहे.