Simhastha Kumbh Mela 2027 : सिंहस्थ कुंभमेळा २०२७ च्या कामांना वेग आला आहे. नाशिक मध्ये होणाऱ्या आगामी कुंभमेळ्यात सुमारे २७ हजार कोटी रुपयांची आर्थिक उलाढाल होण्याचा अंदाज आहे. एवढ्या मोठ्या प्रमाणात होणाऱ्या आर्थिक संधीचा लाभ महिला बचत गट, पथविक्रेते आणि स्थानिक सूक्ष्म उद्योजकांना मिळावा, यासाठी नाशिक-त्र्यंबकेश्वर कुंभमेळा प्राधिकरण आणि देआसरा फाउंडेशन यांनी संयुक्तपणे राबविलेल्या ‘अनेक’ (ANEK: Accelerating Nano Enterprises through Kumbh) उपक्रमाच्या पुढील टप्प्याला प्रारंभ केला आहे. या अंतर्गत उमेद (UMED) आणि राष्ट्रीय नागरी उपजीविका अभियान (NULM) अंतर्गत लाभार्थ्यांसाठी क्षमता विकास कार्यक्रम राबविण्यात येणार आहेत. (Simhastha Kumbh Mela 2027)
२७ हजार कोटी रुपयांची उलाढाल अपेक्षित
यापूर्वी कुंभमेळा प्राधिकरण आणि देआसरा फाउंडेशन यांच्या सहकार्याने करण्यात आलेल्या अभ्यासात सिंहस्थ कुंभमेळा २०२७ मुळे प्रत्यक्ष, अप्रत्यक्ष आणि त्यातून निर्माण होणाऱ्या आर्थिक व्यवहारांद्वारे सुमारे २७ हजार कोटी रुपयांची उलाढाल होईल, असा अंदाज व्यक्त करण्यात आला आहे. या आर्थिक प्रवाहात स्थानिक उद्योजकांचा अधिकाधिक सहभाग वाढावा, हा या उपक्रमामागील प्रमुख उद्देश आहे. या उपक्रमाअंतर्गत ४ ऑगस्ट रोजी उमेदमधील महिला बचत गटांसाठी, तर ५ ऑगस्ट रोजी राष्ट्रीय नागरी उपजीविका अभियानातील पथविक्रेते आणि महिला बचत गटांसाठी मार्गदर्शन सत्रांचे आयोजन करण्यात येणार आहे. या सत्रांमध्ये कुंभमेळ्यातील व्यवसायाच्या संधी, व्यवसायासाठी समाजमाध्यमांचा प्रभावी वापर आणि आर्थिक साक्षरता याविषयी मार्गदर्शन केले जाणार आहे. (Simhastha Kumbh Mela 2027)
आर्थिक संधींचा लाभ स्थानिकांपर्यंत पोहोचणे महत्त्वाचे
कुंभमेळा प्राधिकरणाचे आयुक्त शेखर सिंह यावेळी म्हणाले, "सिंहस्थ कुंभमेळ्यामुळे निर्माण होणाऱ्या आर्थिक संधींचा लाभ स्थानिकांपर्यंत पोहोचणे गरजेचे आहे. महिला बचत गट, पथविक्रेते आणि सूक्ष्म उद्योजकांना सक्षम करून त्यांचा या अर्थचक्रात सक्रिय सहभाग वाढविण्यावर आमचा भर आहे. 'अनेक' उपक्रमातून स्थानिक उद्योजकांना दीर्घकालीन व्यवसाय संधी उपलब्ध करून देण्याचा प्रयत्न केला जात आहे. (Simhastha Kumbh Mela 2027)
नाशिक जिल्हा परिषद मुख्य कार्यकारी अधिकारी ओमकार पवार यावेळी म्हणाले, सिंहस्थ कुंभमेळा हा ग्रामीण भागातील महिला बचत गटांसाठी आणि सूक्ष्म उद्योजकांसाठी मोठी आर्थिक संधी आहे. 'उमेद' अभियानाच्या माध्यमातून महिला बचत गटांना आवश्यक कौशल्य, व्यवसायविषयक मार्गदर्शन आणि बाजारपेठेची तयारी करून देण्यावर भर दिला जाणार आहे. त्यामुळे त्या कुंभमेळ्यात उपलब्ध होणाऱ्या व्यवसायाच्या संधींचा प्रभावीपणे लाभ घेऊन आपले उत्पन्न वाढवू शकतील. (Simhastha Kumbh Mela 2027)
देआसरा फाउंडेशनच्या मुख्य कार्यकारी अधिकारी प्रज्ञा गोडबोले म्हणाल्या, सिंहस्थपूर्व काळात स्थानिक उद्योजकांना आवश्यक प्रशिक्षण, मार्गदर्शन आणि बाजारपेठेची तयारी करून दिल्यास ते कुंभमेळ्यादरम्यान उपलब्ध होणाऱ्या संधींचा अधिक प्रभावीपणे लाभ घेऊ शकतील. हा उपक्रम त्याच दिशेने उचललेले महत्त्वाचे पाऊल आहे.