महाराष्ट्रातील लाखो भाविकांचे श्रद्धास्थान असलेल्या कोल्हापूरच्या प्रसिद्ध संत बाळूमामा मंदिरात तब्बल ६० कोटी ७५ लाख रुपयांचा आर्थिक घोटाळा झाल्याचा गुन्हा पोलीस ठाण्यात नोंदविण्यात आला आहे. राज्यातील मंदिरांमधील हा सर्वात मोठा गैरव्यवहार असल्याची चर्चा आहे.
आर्थिक घोटाळा प्रकरणी उपनिबंधक रागिणी (रोहिणी) खडके यांच्यासह तिघांविरोधात गुन्हा दाखल झाला आहे. गुन्हा दाखल होऊनही खडके अद्याप फरार असल्याने पोलिसांच्या कारवाईवर प्रश्नचिन्ह उपस्थित केले जात आहे. तक्रारदार अरुण हत्ती आणि प्रवीण पाटील यांनी तत्कालीन सहाय्यक धर्मादाय आयुक्त निवेदिता पवार यांच्यावर या संपूर्ण घोटाळ्याचे सूत्रधार असल्याचा आरोप केला आहे.
घोटाळ्यातील ६ गंभीर आरोप :
- जमीन व्यवहारातील अपहार : अवघ्या २० लाखांची जमीन दुरुस्ती दस्ताद्वारे थेट ३ कोटी रुपयांना दाखवून निधी लाटला.
- २३ जमिनींच्या नोंदींत तफावत : देवस्थानाच्या २३ जमिनींची मालकी आणि कागदपत्रांमध्ये मोठे घोळ आढळले आहेत.
- देणगीचा हिशोब गायब : दानपेटी, पशुधन विक्री व इतर मार्गाने येणाऱ्या कोट्यवधींच्या देणगीचा कोणताही अधिकृत हिशोब नाही.
- सोन्याचांदीचे दागिने गहाळ : भाविकांनी अर्पण केलेल्या सोन्याचांदीच्या दागिन्यांचे वजन, नोंद व विक्रीची माहिती गहाळ आहे.
- दोन वेगवेगळ्या नोंदवह्या : उत्पन्न आणि खर्च वेगळा दाखवून आर्थिक फेरफार करण्यासाठी दोन स्वतंत्र नोंदवह्या वापरल्या गेल्या.
- बनावट कागदपत्रे : एफआयआरनुसार (FIR) बनावट कागदपत्रे तयार करणे, विश्वासघात आणि पुराव्यांत फेरफार केल्याचे स्पष्ट झाले आहे.