- विशेष तपासणी करून कारवाई होणार; वाहतूक विभागाचे राज्यातील सर्व पोलीस आयुक्तांना पत्र
मुंबई : आपल्या खासगी दुचाकी आणि चारचाकी वाहनांवर 'पोलीस' असे लिहून किंवा लाल रंगाची पाटी लावून चमकोगिरी करणे आता महागात पडणार आहे. अशा प्रकारांना आळा घालण्यासाठी विशेष मोहीम राबवून दंडात्मक कारवाई करण्याचे निर्देश अपर पोलीस महासंचालक (वाहतूक) कार्यालयाने राज्यातील सर्व पोलीस आयुक्त आणि पोलीस अधीक्षकांना दिले आहेत.
राज्यातील अनेक पोलीस अधिकारी व अंमलदार आपल्या खासगी वाहनांवर 'पोलीस' असे लाल रंगाच्या अक्षरांत लिहून किंवा पाटी लावून फिरताना दिसतात. मात्र, अशा पाट्यांचा वापर करून अवैध कामे केली जात असल्याचे आणि पोलीस पाटीमुळे या गाड्यांची साधी तपासणीही होत नसल्याने त्यांचा वापर भाडेतत्त्वावर अवैध वस्तूंची ने-आण करण्यासाठी केला जात असल्याच्या तक्रारी प्राप्त झाल्या होत्या. मुंबई उच्च न्यायालयानेही या गैरप्रकाराबाबत तीव्र नाराजी व्यक्त करत कठोर कारवाईचे आदेश दिले होते.
या पार्श्वभूमीवर, महामार्गांवर तसेच शहरांत अशा प्रकारे 'पोलीस' पाटी किंवा नाव आढळल्यास संबंधित वाहनचालकांवर महाराष्ट्र मोटार वाहन नियम १९८९ च्या कलम १३३ (६) सह मोटार वाहन कायदा १९८८ च्या कलम १७७ अन्वये कायदेशीर कारवाई केली जाणार आहे. यामुळे नियमबाह्य पद्धतीने खासगी वाहनांवर शासकीय पदाचा रुबाब दाखवणाऱ्या चालकांवर चाप बसणार आहे.