राष्ट्रकुल क्रीडा स्पर्धा 2026 भारताच्या यशस्वी कामगिरीनिमित्त ग्लासगोमधील एका भारतीय रेस्टॉरंटमध्ये आयोजित स्नेहभोजनादरम्यान वाद निर्माण झाला आहे. ऑलिम्पिक पदक विजेती बॉक्सर लव्हलिना बोरगोहेन यांनी रेस्टॉरंटमध्ये वापरण्यात आलेल्या नॅपकिनवर भारताचा अपूर्ण नकाशा असल्याचे निदर्शनास आणून दिले. या नकाशामध्ये ईशान्य भारताचा भाग दिसत नसल्याने त्यांनी नाराजी व्यक्त केली.
आसामची रहिवासी असलेल्या लव्हलिना यांनी माध्यमांशी बोलताना सांगितले की, रेस्टॉरंटमध्ये लावलेल्या नकाशामध्येही ईशान्य भारताचा समावेश नव्हता. देशाचा कोणताही भाग नकाशातून वगळला जाऊ नये, असे सांगत त्यांनी रेस्टॉरंट व्यवस्थापनाला ही चूक तातडीने दुरुस्त करण्याचे आवाहन केले.
लव्हलिना म्हणाल्या की, ईशान्य भारतातील नागरिक म्हणून अशा प्रकारची चूक पाहून त्यांना दुःख झाले. भविष्यात अशा गोष्टींकडे अधिक काळजीपूर्वक लक्ष द्यावे, अशी विनंतीही त्यांनी केली.
या मुद्द्यावर भारतीय बॉक्सिंग महासंघाचे (BFI) अध्यक्ष अजय सिंग यांनीही लव्हलिनाच्या भूमिकेला पाठिंबा दिला. त्यांनी नकाशामध्ये जम्मू-काश्मीरचा भागही पूर्णपणे दर्शवलेला नसल्याचे सांगत रेस्टॉरंटने योग्य नकाशाचा वापर करावा, अशी मागणी केली.
दरम्यान, राष्ट्रकुल क्रीडा स्पर्धेत भारताच्या बॉक्सिंग संघाने यंदा ऐतिहासिक कामगिरी केली. भारताने बॉक्सिंगमध्ये विक्रमी 7 सुवर्णपदके जिंकली. महिलांमध्ये प्रीती पवार, जस्मिन लंबोरिया, साक्षी चौधरी, अरुंधती चौधरी आणि प्रिया घंगास यांनी सुवर्णपदके पटकावली. तर पुरुष गटात सचिन सिवाच आणि अंकुश पांघल यांनीही सुवर्णपदके जिंकून भारताची कामगिरी अधिक भक्कम केली.
महिलांच्या 70 किलो वजनी गटाच्या अंतिम सामन्यात लव्हलिना बोरगोहेन यांना ऑस्ट्रेलियाच्या एमा-सू ग्रीनट्रीकडून पराभव स्वीकारावा लागला आणि त्यांना रौप्यपदकावर समाधान मानावे लागले.
या प्रकरणानंतर भारतीय बॉक्सिंग संघाने रेस्टॉरंट व्यवस्थापनाला चुकीचे डिझाइन हटवून भारताच्या अधिकृत आणि संपूर्ण सीमा दर्शवणारा नकाशा वापरण्याची विनंती केली आहे. मात्र, या घटनेबाबत रेस्टॉरंटकडून अद्याप कोणतीही अधिकृत प्रतिक्रिया देण्यात आलेली नाही.