लपवलेले प्रेमसंबंध, कर्ज, नोकरी, शिक्षण आणि व्यसनांची पडताळणी; ऑनलाईन मॅट्रिमोनियल फसवणूक टाळण्यासाठी कुटुंबे अधिक सतर्क
पुणे: पुण्यातील लोहगड किल्ल्यावर केतन अगरवाल यांचा कथितपणे त्यांच्या होणाऱ्या पत्नी सिया गोयल हिने ढकलून खून केल्याची घटना समोर आल्यानंतर विवाह ठरवताना कुटुंबांमध्ये सावधगिरी वाढली आहे. आता केवळ नातेवाईकांकडून चौकशी, नोकरी किंवा पत्रिका जुळवण्यावर समाधान न मानता अनेक कुटुंबे थेट खाजगी डिटेक्टिव्ह एजन्सीकडून होणाऱ्या वधू-वराची सविस्तर पार्श्वभूमी तपासून घेत आहेत.
मुंबईतील आघाडीच्या डिटेक्टिव्ह एजन्सींच्या माहितीनुसार, गेल्या काही महिन्यांत 'प्री-मॅरिटल बॅकग्राउंड चेक'साठी येणाऱ्या चौकशीत आणि अर्जांमध्ये लक्षणीय वाढ झाली आहे. या तपासणीमध्ये पूर्वीचे प्रेमसंबंध, सोशल मीडियावरील हालचाली, आर्थिक कर्ज, न्यायालयीन वाद, शैक्षणिक पात्रता, नोकरीची माहिती तसेच मद्यपान, जुगार किंवा इतर व्यसनांची पडताळणी केली जात आहे.
एजन्सींच्या म्हणण्यानुसार, या चौकशीमुळे अनेक विवाह प्रस्ताव अंतिम टप्प्यापूर्वीच रद्द झाले आहेत. एका प्रकरणात तरुणीचे पूर्वीच्या मित्रासोबत साधे संभाषण सुरू असल्याचे समजताच साखरपुडा मोडल्याचे सांगितले जाते. तर दुसऱ्या प्रकरणात वराने मोठे कर्ज आणि सुरू असलेले न्यायालयीन वाद लपवल्याचे उघड झाल्यानंतर विवाह नाकारण्यात आला. आणखी एका प्रकरणात सहकारी महिलेसोबत नियमित प्रवास करत असल्याची माहिती मिळाल्यानंतर कोणताही गैरसंबंधाचा पुरावा नसतानाही कुटुंबाने लग्नातून माघार घेतल्याचे समोर आले.
ऑनलाईन मॅट्रिमोनियल वेबसाइट्स आणि डेटिंग अॅप्समुळे अनोळखी व्यक्तींशी संपर्क वाढल्याने फसवणुकीचा धोका लक्षात घेऊन पालक अधिक सतर्क झाले आहेत.
दरम्यान, माजी आयपीएस अधिकारी आणि वकील वाय. पी. सिंग यांनी स्पष्ट केले की, सार्वजनिक नोंदींची कायदेशीर चौकशी किंवा सामान्य माहितीची पडताळणी करणे गुन्हा नाही. मात्र, एखाद्या व्यक्तीचा बेकायदेशीर पाठलाग करणे, कॉल डिटेल्स, खासगी संदेश किंवा ईमेल हॅक करणे हे गंभीर आणि कायद्याने दंडनीय अपराध असल्याचा इशाराही त्यांनी दिला.