बुलढाणा : समृद्धी महामार्गावरील अपघातांचे सत्र सुरुच असून मंगळवारी पहाटेच्या सुमारास आणखी एक भीषण अपघाताची घटना समोर आली आहे. चालकाला अचानक झोपेची डुलकी आल्याने भरधाव वेगातील ट्रकने समोरील वाहनाला पाठीमागून जोरदार धडक दिली. हा अपघात इतका भीषण होता की, ट्रक चालकाचा घटनास्थळीच करुण अंत झाला, तर सुदैवाने त्याचा क्लिनर या अपघातात किरकोळ जखमी झाला आहे.
नेमकी घटना काय घडली ?
मिळालेल्या सविस्तर माहितीनुसार, राजस्थान पासिंग असलेला 'आरजे-जीडी ४४१२' (RJ-GD 4412) क्रमांकाचा ट्रक समृद्धी महामार्गावरून प्रवास करत होता. पहाटे सुमारे ३.५३ वाजेच्या सुमारास ट्रक समृद्धी महामार्गावरील चॅनेल क्रमांक २६९,४०० जवळ आला असता, चालक लेकराज (वय २६, रा. टेडीबगिया, ता. जि. आग्रा, उत्तर प्रदेश) याला अचानक झोपेची डुलकी आली. पहाटेच्या वेळी गाडीवरील ताबा सुटल्यामुळे भरधाव ट्रक समोरील अज्ञात वाहनावर जाऊन पाठीमागून वेगाने धडकला. ही धडक इतकी भयंकर होती की ट्रकच्या समोरील कॅबिनचा पूर्णपणे चुराडा झाला. या घटनेत गंभीर दुखापत झाल्यामुळे चालक लेकराज याचा जागीच मृत्यू झाला. तर त्याच्यासोबत असलेला क्लिनर सोनू निरंजन निषाद (रा. फरे, जि. मथुरा, उत्तर प्रदेश) हा सुदैवाने किरकोळ जखमी झाला.
जखमीवर रुग्णालयात उपचार सुरू
अपघाताची माहिती मिळताच महामार्ग पोलीस आणि स्थानिक पोलिसांनी तातडीने घटनास्थळाकडे कूच केले. मेहकरजवळील फरदापूर पोलीस चौकीचे पोलीस निरीक्षक सुनील सोळंके, सहायक पोलीस उपनिरीक्षक मंगेश खडसे, तसेच पोलीस कर्मचारी निलेश राठोड, धीरज चंदन, मंगेश तंत्रे आणि गजानन जाधव यांनी तात्काळ घटनास्थळी पोहोचून मदतकार्य सुरू केले. पोलिसांनी अपघातात जखमी झालेल्या क्लिनर सोनू निषाद याला उपचारासाठी तात्काळ जवळच्या स्थानिक रुग्णालयात दाखल केले. तसेच, अपघातामुळे समृद्धी महामार्गावर झालेली वाहतूक कोंडी टाळण्यासाठी अपघातग्रस्त ट्रक बाजूला हटवून रस्त्यावरील वाहतूक पूर्ववत सुरळीत करण्यात आली. या प्रकरणी पोलीस अधिक तपास करत आहेत.