Nashik News : नाशिकच्या म्हसरूळ-मखमलाबाद लिंक रोडवर (Mhasrul-Makhmalabad Link Road) एक धक्कादायक घटना समोर आली आहे. म्हसरूळ-मखमलाबाद लिंक रोडवरील कनसरा माता चौकात (Kansara Mata Chowk) बुधवारी दुपारी सव्वा दोन वाजेच्या सुमारास भुयारी गटाराचे खोदकाम सुरू असताना ‘महाराष्ट्र नॅचरल गॅस लिमिटेड’ची (Maharashtra Natural Gas Limited) मुख्य गॅस पाइपलाइन फुटल्याची घटना घडली आहे.
पाइपलाइन फुटल्यानंतर काहीच वेळात आगीचा मोठा भडका उडाल्याने वर्दळीच्या या रस्त्यावर वाहनधारक आणि स्थानिक नागरिकांमध्ये भीतीचे वातावरण पसरले. अग्निशामक दलाने दाखवलेली तत्परता आणि स्थानिक लोकप्रतिनिधींच्या प्रसंगावधानामुळे याठिकाणी मोठी दुर्घटना टळली आहे.
नेमकं काय घडलं ?
पंचवटी विभागात (Panchvati Division) रस्ते काँक्रिटीकरण, ड्रेनेज लाईन, स्मार्ट सिटी आणि युटिलिटीची विविध विकासकामे प्रगतीपथावर आहेत. म्हसरूळ-मखमलाबाद लिंक रोडवरील साई संदेश चौकाजवळ रस्त्याच्या कामाला अडथळा ठरणार्या भुयारी गटाराच्या चेंबरचे खोदकाम सुरू होते. दुपारी सव्वा दोनच्या सुमारास हे काम सुरू असताना एमएनजीएलची पाइपलाइन अचानक गळती होऊन फुटली.
गॅस (Gas) लिकेज झाल्यानंतर पुढील एक तासाच्या अंतराने अचानक हवेत आगीचा प्रचंड भडका उडाला. स्थानिकांनी तत्परता दाखवत याबाबत पंचवटी अग्निशामक केंद्राला माहिती दिली. त्यानंतर प्रभारी केंद्रप्रमुख संजय कानडे, फायरमन गणेश रकीबे, सिद्धार्थ गोतीस, संकेत वैष्णव व वाहनचालक अशोक सरोदे यांनी तात्काळ घटनास्थळी धाव घेत आगीवर वेळेत नियंत्रण मिळवले. मात्र अचानक हवेत अशाप्रकारे आगीच्या ज्वाळा पसरल्याने वर्दळीच्या या ठिकाणी नागरिकांमध्ये भीतीचे वातावरण पसरले आहे. सुदैवाने या घटनेत कोणतीही जीवितहानी झाली नाही.