Ladki Bahin Yojana : राज्य सरकारने राज्यातील गरजू महिलांसाठी सुरु केलेली लाडकी बहीण योजना अनेक महिलांसाठी मोठा आधार देणारी ठरत आहे. मात्र या लाडक्या बहिणींच्या पैश्यांवर काही भावांनी डल्ला मारल्याच्या घटना उघडकीस येत आहे. अहिल्यानगर जिल्ह्यात देखील असाच एक प्रकार उघडकीस आल्याने एकच खळबळ उडाली आहे. (Ladki Bahin Yojana)
५२३ पुरुषांनी लाटले ७४.७५ लाख
राज्य सरकारने २८ जून २०२४ रोजी महिलांच्या आर्थिक स्वातंत्र्यासाठी, त्यांच्या आरोग्य आणि पोषणामध्ये सुधारणा करणे आणि कुटुंबातील त्यांची निर्णायक भूमिका मजबुती व्हावी या हेतूने या योजनेसाठी मान्यता दिलेली. मात्र या योजनेचा फायदा पुरुषांनी घेतल्याने एकच खळबळ उडाली आहे. अहिल्यानगर जिल्ह्यात तब्बल ५२३ जणांनी हा लाभ घेतल्याचे निष्पन्न झाले आहे. ही रक्कम तब्बल ७४ लाख ७५ हजार रुपये आहे. जिल्ह्यात त्याची वसुली करण्याची प्रक्रिया सुरू आहे. मात्र यातील काहीजणांचा अद्यापही शोध लागलेला नाही. (Ladki Bahin Yojana)
लाडक्यांची शोधमोहीम सुरु
राज्यसरकारच्या महत्त्वकांक्षी योजनांचा गैरफायदा घेणाऱ्या पुरुषांची आता शोधमोहीम सुरू आहे. काही जणांचा पत्ता लागला असून, त्यांच्याकडून वसुलीसाठी सरकारी कर्मचारी हेलपाटे घालीत आहेत. अर्ज करताना जो निवासाचा पत्ता दिला होता, त्या पत्त्यावर संबंधित लाभ घेणारी व्यक्ती नसल्याचे समजते. त्यामुळे वसुलीसाठी अडचण निर्माण झाली आहे. जिल्ह्यात ही योजना सुरू झाली त्यावेळी १२ लाख ४१ हजार ८७६ अर्ज आले होते. त्यातून ११ लाख २६ हजार ६५२ अर्ज मंजूर करण्यात आले. (Ladki Bahin Yojana)
नेमके काय झाले ?
लाडकी बहीण योजनेचे अर्ज करताना काहींनी चुकीची माहिती दिली. अर्ज करताना काहींनी पतीचे किंवा मुलाचे आधारकार्ड किंवा बँकेची माहिती दिली. काही महिलांकडून अनावधानाने अथवा अज्ञानामुळे ही कृती झाली, तर काहींनी जाणीवपूर्वक ही माहिती भरली. छाननीदरम्यान त्यांचे हे कृत्य उघडकीस आले आहे. यातील काही महिला अर्जदार असूनही त्याच्या नावापुढे पुरुष लिहिले गेल्याचीही उदाहरणे आहेत.