फुटबॉल जगतातील लोकप्रिय तारा ख्रिस्तियानो रोनाल्डो आणि त्याची पार्टनर, मॉडेल जॉर्जियाना रॉड्रिगेझ यांच्या लग्नाची चर्चा सध्या जगभरात जोरदार सुरू आहे. मिळालेल्या माहितीनुसार, हे प्रसिद्ध जोडपे या आठवड्याच्या अखेरीस रोनाल्डोचे जन्मस्थान असलेल्या पोर्तुगालमधील मादेरा बेटावर विवाहबंधनात अडकणार आहे. जरी या जोडप्याने अद्याप अधिकृत पुष्टी केली नसली, तरी ब्रिटिश वृत्तपत्र 'द सन'च्या वृत्तानुसार, बेटाची राजधानी फुनशाल येथील ऐतिहासिक कॅथेड्रल विवाह सोहळ्यासाठी आरक्षित करण्यात आले आहे.
याआधी नोव्हेंबरमध्ये पोर्तुगीज दैनिक 'जॉर्नल दा मडेरा'नेही रोनाल्डोला आपल्या मायदेशात लग्न करायचे असल्याचे वृत्त दिले होते. विवाहानंतरचा खासगी सोहळा फुनशालमधीलच एका पंचतारांकित 'सवॉय पॅलेस हॉटेल'मध्ये पार पडण्याची शक्यता आहे. सूत्रांच्या माहितीनुसार, हॉटेलमधील पाहुण्यांना शुक्रवार आणि शनिवारी दोन मजले आणि बारचे काही भाग उपलब्ध नसल्याची माहिती आधीच देण्यात आली आहे. रोनाल्डोसाठी मादेरा हे केवळ लग्नाचे ठिकाण नसून, त्याची फुटबॉल कारकीर्द सुरू होण्यापूर्वी त्याचे बालपण याच फुनशाल शहरात गेले आहे.
रोनाल्डो आणि जॉर्जियाना २०१६ मध्ये माद्रिदमध्ये एका गुच्ची स्टोअरमध्ये भेटले होते. तेव्हापासून हे जोडपे एकत्र राहत असून त्यांनी सुंदर संसार थाटला आहे. दरम्यान, ऑगस्ट २०२५ मध्ये रोनाल्डोने जॉर्जियानाला लग्नाची मागणी घातली होती. त्यानंतर जॉर्जियानाने तिच्या इन्स्टाग्रामवर अंगठीचा फोटो शेअर करत “हो, मी तयार आहे. या जन्मात आणि माझ्या सर्व जन्मांमध्ये,” असे लिहीत आपल्या साखरपुड्याची अधिकृत घोषणा केली होती. आता या बहुप्रतिक्षित विवाहसोहळ्याची त्यांचे चाहते आतुरतेने वाट पाहत आहेत.