जालना : जालना जिल्ह्यातील भोकरदनमध्ये एका कॉलेजच्या नव्या इमारतीचे बांधकाम सुरू आहे. हे बांधकाम सुरू असताना स्लॅब कोसळला. या दुर्घटनेत बांधकामस्थळी उपस्थित असलेल्या एका मजुराचा मृत्यू झाला. इतर चार मजूर जखमी झाले. जखमींपैकी एकाची प्रकृती गंभीर आहे.
स्लॅब कोसळताच बांधकामस्थळी उपस्थित असलेल्या इतर मजुरांनी लगेच मदतकार्य सुरू केले. कोसळलेल्या स्लॅबचा ढिगारा उपसण्याचे प्रयत्न सुरू केले. घटनेची माहिती पोलिसांना देण्यात आली. दुर्घटनेचा आवाज ऐकून आसपास उपस्थित स्थानिक पण मदतीसाठी सरसावले. तातडीने जेसीबीची व्यवस्था करून ढिगारा उपसण्याचे काम वेगाने सुरू करण्यात आले. कोसळलेल्या स्लॅबच्या ढिगाऱ्याखाली अडकलेल्या चार मजुरांना बाहेर काढून रुग्णालयात दाखल करण्यात आले.
हाती आलेल्या माहितीनुसार, दुर्घटनेत मोतीलाल रामजी मिरगे (५०, रा. मुठाड, ता. भोकरदन) यांचा मृत्यू झाला. तर कृष्णा नामदेव हिरे (३०, रा. दगडवाडी), कृष्णा विठ्ठल शिंदे (४०, रा. वाकडी), फारुख खा शारूख खा (३८, रा. दानापूर) आणि लक्ष्मण गणेश ठोंबरे ३०, रा. सुरंगळी) हे जखमी झाले आहेत. सर्व जखमींना तातडीने भोकरदन येथील रुग्णालयात दाखल करण्यात आले आहे.
कॉलेजच्या नव्या इमारतीचे बांधकाम सुरू असताना स्लॅब कोसळला. या दुर्घटनेमागचे कारण अद्याप समजलेले नाही. पोलीस तपास सुरू आहे. बांधकाम करताना झालेली चूक अथवा निकृष्ट साहित्याचा वापर करून केलेले बांधकाम या दोन पैकी एका कारणामुळे दुर्घटना झाल्याची शक्यता व्यक्त होत आहे.