मुंबई: बॉलिवूड अभिनेता सलमान खानच्या वांद्रे येथील 'गॅलेक्सी अपार्टमेंट' या निवासस्थानाबाहेर सुरक्षेसाठी तैनात असलेल्या एका पोलीस कॉन्स्टेबलचा हृदयविकाराच्या झटक्याने दुर्दैवी मृत्यू झाल्याची घटना समोर आली आहे. गणेश रायते (वय ४१ वर्षे) असे या मृत पोलीस कर्मचाऱ्याचे नाव असून, ते मुंबई पोलिसांच्या एलए-४ (LA-4) तुकडीत कार्यरत होते. या घटनेमुळे पोलीस दलात आणि परिसरात हळहळ व्यक्त केली जात आहे.
कर्तव्यावर असताना घडली दुर्दैवी घटना
पोलीस सूत्रांनी दिलेल्या माहितीनुसार, गुरुवारी सायंकाळी गॅलेक्सी अपार्टमेंटबाहेर सुरक्षेचे कर्तव्य बजावत असताना गणेश रायते यांना अचानक अस्वस्थ वाटू लागले आणि ते खाली कोसळले. तिथ उपस्थित असलेल्या इतर पोलीस कर्मचाऱ्यांनी तातडीने त्यांना उपचारासाठी जवळच्या रुग्णालयात दाखल केले. मात्र, डॉक्टरांनी तपासणीअंती त्यांना मृत घोषित केले. प्राथमिक वैद्यकीय अहवालानुसार, त्यांचा मृत्यू तीव्र हृदयविकाराच्या झटक्याने झाल्याचे स्पष्ट झाले आहे. विशेष म्हणजे, गणेश रायते हे यापूर्वी लष्करात सेवा बजावून नंतर मुंबई पोलिसांमध्ये भरती झाले होते.
वाय-प्लस सुरक्षेदरम्यान घडली घटना
गँगस्टर लॉरेन्स बिश्नोई टोळीकडून मिळणाऱ्या सततच्या धमक्यांमुळे अभिनेता सलमान खानला सध्या 'वाय-प्लस' (Y+) दर्जाची कडक सुरक्षा व्यवस्था पुरवण्यात आली आहे. या पार्श्वभूमीवर त्याच्या वांद्रे येथील घराबाहेर २४ तास पोलिसांचा मोठा ताफा तैनात असतो. यापूर्वी गॅलेक्सी अपार्टमेंटबाहेर गोळीबाराची अत्यंत खळबळजनक घटना घडली होती, त्यामुळे या परिसरातील सुरक्षा आणखी वाढवण्यात आली आहे. अशा संवेदनशील आणि कडक सुरक्षेच्या वातावरणात कर्तव्यावर असतानाच ही दुर्दैवी घटना घडली. मुंबई पोलिसांनी या प्रकरणी अकस्मात मृत्यूची नोंद केली असून पुढील कायदेशीर प्रक्रिया सुरू केली आहे.
'बीइंग ह्युमन' ज्वेलरी फ्रँचायझी फसवणूक प्रकरण
दुसऱ्या एका घडामोडीत, अभिनेता सलमान खान, त्याची बहीण अलविरा खान-अग्निहोत्री आणि 'स्टाईल अँड कन्टेन्ट ज्वेलरी प्रायव्हेट लिमिटेड'च्या संचालकांना चंदीगड जिल्हा न्यायालयाने नोटीस बजावली आहे. 'बीइंग ह्युमन' ब्रँडच्या ज्वेलरी फ्रँचायझीशी संबंधित ३ कोटी रुपयांच्या फसवणूक प्रकरणात न्यायालयानं ही कायदेशीर कारवाई केली आहे. चंदीगडमधील मणीमाजरा भागात 'बीइंग ह्युमन' ज्वेलरीचा शोरूम सुरू करण्यासाठी स्थानिक व्यावसायिक अरुण गुप्ता यांनी सुमारे ३ कोटी रुपयांची मोठी गुंतवणूक केली होती.
या प्रकरणासाठी त्यांनी ब्रँडचे अधिकृत मार्केटिंग करणाऱ्या कंपनीसोबत करार करून सर्व अटी पूर्ण केल्या होत्या. केवळ शोरूमच्या उभारणीवरच १ कोटी रुपयांहून अधिक खर्च करण्यात आला होता. व्यवसाय सुरू करताना मोठ्या नफ्याचे आणि पूर्ण सहकार्य करण्याचे आश्वासन देण्यात आले होते, परंतु शोरूम सुरू झाल्यावर कंपनीकडून कोणतेही सहकार्य मिळाले नाही, असा आरोप तक्रारदाराने केला आहे. या दोन्ही घटनांमुळे सध्या अभिनेता सलमान खान पुन्हा एकदा चर्चेच्या केंद्रस्थानी आला आहे.