ठाणे : माजी खासदार आणि शिवसेना (UBT) नेते विनायक राऊत (Vinayak Raut) यांना ठाणे सत्र न्यायालयाकडून मोठा दिलासा मिळाला आहे. कौटुंबिक हिंसाचार आणि कथित अंधश्रद्धाविरोधी कायद्याशी संबंधित प्रकरणात न्यायालयाने विनायक राऊत, त्यांचा मुलगा गितेश यांच्यासह कुटुंबातील आणखी तीन सदस्यांना अटकपूर्व जामीन मंजूर केला आहे.
विनायक राऊत (Vinayak Raut) यांच्या सुनेने, म्हणजेच गितेश राऊत यांच्या पत्नी गिरिजा राऊत यांनी केलेल्या तक्रारीनंतर कापूरबावडी पोलीस ठाण्यात हे प्रकरण दाखल करण्यात आले होते.
सुनेने केले होते गंभीर आरोप :
गिरिजा राऊत यांनी आपल्या तक्रारीत पती आणि सासरच्या मंडळींकडून शारीरिक आणि मानसिक त्रास, वैवाहिक गैरवर्तन तसेच छळ केल्याचा आरोप केला होता. तसेच आपल्याला कथितरीत्या काही अघोरी किंवा अंधश्रद्धेच्या विधींमध्ये सहभागी होण्यास भाग पाडण्यात आल्याचा दावाही त्यांनी केला होता. या तक्रारीच्या आधारे पोलिसांनी भारतीय न्याय संहिता (BNS) मधील संबंधित कलमांसह महाराष्ट्रातील मानवी बळी आणि इतर अमानुष, अघोरी प्रथा व काळ्या जादूविरोधी कायद्यांतर्गत गुन्हा दाखल केला होता. (Vinayak Raut)
पाच जणांना अटकपूर्व जामीन :
अतिरिक्त सत्र न्यायाधीश एस. पी. अग्रवाल यांनी शुक्रवारी पाच आरोपींच्या अटकपूर्व जामीन अर्जावर सुनावणी करत त्यांना दिलासा दिला.अटकपूर्व जामीन मिळालेल्यांमध्ये विनायक राऊत, गितेश राऊत, श्यामल राऊत, सुरेखा राजेश सरफारे आणि राजेश नारायण सरफारे यांचा समावेश आहे. (Vinayak Raut)
न्यायालयाने कोणत्या बाबींचा विचार केला?
न्यायालयाने निरीक्षण नोंदवताना म्हटले की, गिरिजा राऊत यांनी २०१८ ते २०२२ या कालावधीत अंधश्रद्धेशी संबंधित कथित विधी झाल्याचा आरोप केला असला, तरी त्या कालावधीत त्यांनी पोलिसांकडे तक्रार दाखल केली नव्हती. तसेच प्राथमिकदृष्ट्या पाहता तक्रारीतील आरोप २०१३च्या अंधश्रद्धाविरोधी कायद्यातील प्रतिबंधित ‘अघोरी’ प्रथांच्या निकषांपर्यंत पोहोचतात का, याबाबतही न्यायालयाने विचार केला. या कायद्यात गंभीर शारीरिक इजा किंवा शारीरिक हानीशी संबंधित कृत्यांचा समावेश असल्याचे न्यायालयाने नमूद केले. (Vinayak Raut)
कोठडीतील चौकशीची गरज नसल्याचे मत :
न्यायालयाने आरोपींची कोठडीत घेऊन चौकशी करण्याची आवश्यकता नाही, असे निरीक्षण नोंदवले. अर्जदारांपैकी चार जणांविरोधात संबंधित स्वरूपाची गंभीर पूर्व गुन्हेगारी पार्श्वभूमी नसल्याचेही न्यायालयाच्या निदर्शनास आले. (Vinayak Raut)
२५ हजार रुपयांच्या वैयक्तिक जातमुचलक्यावर जामीन :
न्यायालयाने निर्देश दिले की, आरोपींना अटक झाल्यास प्रत्येकी २५ हजार रुपयांच्या वैयक्तिक जातमुचलक्यावर (स्वतःच्या जबाबदारीवर व हमीवर ) आणि त्याच रकमेच्या एक किंवा दोन जामीनदारांच्या हमीवर सोडण्यात यावे. मात्र, न्यायालयाने काही अटीही घातल्या आहेत. (Vinayak Raut)
गितेश राऊत यांना दर शुक्रवारी पोलीस ठाण्यात हजेरी :
गितेश राऊत यांना अंतिम अहवाल दाखल होईपर्यंत दर शुक्रवारी सायंकाळी ७ ते ८ या वेळेत कापूरबावडी पोलीस ठाण्यात हजेरी लावण्याचे निर्देश देण्यात आले आहेत. तर इतर आरोपींना तपास अधिकाऱ्याने बोलावल्यास चौकशीसाठी उपस्थित राहावे लागणार आहे. दरम्यान, न्यायालयाने अटकपूर्व जामीन मंजूर केला असला तरी या प्रकरणातील आरोप अद्याप न्यायालयात सिद्ध झालेले नाहीत. पोलिसांचा पुढील तपास आणि त्यानंतरची न्यायालयीन प्रक्रिया महत्त्वाची ठरणार आहे. (Vinayak Raut)