पुणे : पुण्यातील पब आणि क्लबमध्ये नियमांचे उल्लंघन होत असल्याच्या घटना पुन्हा चर्चेत आल्या आहेत. विमानतळ परिसरातील प्रसिद्ध ‘द हौज कम्युन’ (The Haus Commune) या पबवर पुणे पोलिसांच्या गुन्हे शाखेने रविवारी पहाटे सुमारे ३ वाजता अचानक छापा टाकला. या कारवाईदरम्यान पबमध्ये मोठ्या प्रमाणात पार्टी सुरू असल्याचे आढळून आले. प्रशासनाने पब सुरू ठेवण्यासाठी रात्री दीड वाजेपर्यंतची मुदत दिलेली असताना संबंधित पब पहाटे ३ वाजेपर्यंत सुरू असल्याचे पोलिसांच्या कारवाईत समोर आले. (Pune Pub Raid)
डान्स फ्लोअरवर ८० ते १०० जण :
पोलिसांनी छापा टाकला त्यावेळी पबच्या डान्स फ्लोअरवर तब्बल ८० ते १०० तरुण-तरुणी उपस्थित असल्याचे आढळले. डीजेच्या तालावर पार्टी सुरू असल्याचे पोलिसांच्या निदर्शनास आले. त्यानंतर पोलिसांनी उपस्थित तरुण-तरुणींना ताब्यात घेत त्यांची चौकशी सुरू केली. या प्रकरणात पबचा चालक आणि व्यवस्थापक यांच्याविरोधात गुन्हा दाखल करण्याची प्रक्रिया सुरू असल्याची माहिती समोर आली आहे. (Pune Pub Raid)
गुप्त माहिती मिळताच गुन्हे शाखेची धडक कारवाई :
विमानतळ परिसरातील या पबमध्ये परवानगीच्या वेळेपेक्षा अधिक काळ पार्टी सुरू असल्याची माहिती पुणे पोलिसांच्या गुन्हे शाखेला मिळाली होती. या गुप्त माहितीच्या आधारे पोलिसांच्या पथकाने पहाटेच्या सुमारास अचानक कारवाई केली. छाप्यावेळी पबमध्ये मोठ्या संख्येने ग्राहक उपस्थित असल्याचे आढळले. त्यामुळे पोलिसांनी नियमांचे उल्लंघन झाल्याची बाब गांभीर्याने घेत पुढील कारवाई सुरू केली आहे. (Pune Pub Raid)
पहाटेपर्यंत पब सुरू ठेवण्याची परवानगी कुणाची?
पुणे शहरातील पब आणि क्लबच्या वेळांबाबत प्रशासनाने नियम निश्चित केले आहेत. त्यानुसार संबंधित आस्थापनांना रात्री दीड वाजेपर्यंतच व्यवसाय सुरू ठेवण्याची परवानगी असल्याचे सांगण्यात येते. मात्र, असे असताना हा पब पहाटे ३ वाजेपर्यंत सुरू कसा होता, याचा तपास आता पोलिसांकडून केला जात आहे. याशिवाय पबमध्ये दारू विक्रीसाठी आवश्यक परवाने होते का, तसेच नियमांचे अन्य कोणते उल्लंघन झाले आहे का, याचीही चौकशी करण्यात येत आहे. (Pune Pub Raid)
पब चालक आणि व्यवस्थापनाकडून वेळेच्या नियमांचे उल्लंघन करण्यात आले असल्यास त्यांच्यावर संबंधित कायद्यांतर्गत कारवाई केली जाण्याची शक्यता आहे. पोलिसांच्या पुढील तपासानंतर या प्रकरणातील अधिक माहिती समोर येणार आहे. (Pune Pub Raid)