Rakesh Bedi : “भेसळ करणाऱ्यांवर हत्येच्या प्रयत्नाचा गुन्हा दाखल करा!”; ‘धुरंधर’ फेम राकेश बेदींची संतप्त मागणी, व्हिडिओ व्हायरल

राकेश बेदी यांनी आपल्या व्हिडिओमध्ये अन्नपदार्थ, पेये आणि मद्यामध्ये होणाऱ्या कथित भेसळीवर चिंता व्यक्त केली. केवळ अधिक पैसे कमावण्यासाठी उत्पादनांच्या गुणवत्तेशी तडजोड करणाऱ्यांमुळे असंख्य ग्राहकांचे आरोग्य आणि जीव धोक्यात येऊ शकतो, असे त्यांनी सांगितले.

“लोकांच्या जीवाशी खेळणाऱ्यांवर कठोर कारवाई का होत नाही?” असा सवाल उपस्थित करत बेदी यांनी भेसळ करणाऱ्यांना कडक शिक्षा होण्याची गरज व्यक्त केली. एखादी व्यक्ती जाणीवपूर्वक अन्न किंवा पेयामध्ये भेसळ करत असेल आणि त्यामुळे अनेक लोकांच्या जीवाला धोका निर्माण होत असेल, तर अशा कृत्याकडे अत्यंत गंभीर गुन्हा म्हणून पाहिले पाहिजे, असा त्यांचा युक्तिवाद आहे.

बेदी यांच्या मते, ग्राहकांना विकल्या जाणाऱ्या खाद्यपदार्थांची आणि पेयांची गुणवत्ता ही केवळ व्यावसायिक बाब नसून थेट सार्वजनिक आरोग्याशी संबंधित विषय आहे. त्यामुळे आर्थिक फायद्यासाठी जाणूनबुजून भेसळ करणाऱ्यांना कायद्याचा धाक असणे आवश्यक असल्याचे त्यांनी म्हटले आहे.

दरम्यान, राकेश बेदी गेल्या काही काळापासून सोशल मीडियाच्या माध्यमातून विविध सामाजिक आणि सार्वजनिक विषयांवर आपली भूमिका मांडताना दिसत आहेत. त्यांच्या या भूमिकेची सोशल मीडियावर चर्चा होत आहे.

अभिनयाच्या क्षेत्रात बेदी यांची कारकीर्द चार दशकांहून अधिक काळाची आहे. ‘चश्मे बद्दूर’, ‘कुली नंबर 1’, ‘गदर 2’ आणि ‘तेरी बातों में ऐसा उलझा जिया’ यांसारख्या चित्रपटांमध्ये त्यांनी भूमिका साकारल्या आहेत.

टेलिव्हिजनवरील ‘श्रीमान श्रीमती’, ‘येस बॉस’, ‘भाबी जी घर पर हैं!’ आणि ‘तारक मेहता का उल्टा चष्मा’ यांसारख्या लोकप्रिय मालिकांमधूनही ते घराघरात पोहोचले.

अलीकडे ‘धुरंधर’ चित्रपटातील त्यांच्या भूमिकेमुळेही ते चर्चेत आले आहेत. आता भेसळीविरोधातील त्यांच्या या आक्रमक मागणीमुळे ते पुन्हा एकदा चर्चेच्या केंद्रस्थानी आले आहेत.