मुंबई : पंजाबचे माजी उपमुख्यमंत्री आणि शिरोमणी अकाली दलाचे प्रमुख सुखबीर सिंग बादल यांच्यावर नांदेडमध्ये झालेल्या हल्ल्याचा महाराष्ट्राचे उपमुख्यमंत्री एकनाथ शिंदे यांनी तीव्र निषेध केला आहे. हा हल्ला अत्यंत निंदनीय आणि धक्कादायक असून, या प्रकरणातील दोषींवर कठोर कायदेशीर कारवाई करण्यात येईल, असे शिंदे यांनी स्पष्ट केले.
घटनेची माहिती मिळताच एकनाथ शिंदे यांनी सुखबीर सिंग बादल यांच्या पत्नी आणि पंजाबच्या खासदार हरसिमरत कौर बादल यांच्याशी दूरध्वनीवरून संवाद साधला. यावेळी त्यांनी बादल यांच्या प्रकृतीची विचारपूस केली. सुखबीर सिंग बादल लवकरात लवकर पूर्णपणे बरे व्हावेत, अशी प्रार्थनाही शिंदे यांनी व्यक्त केली.
घटनेचे गांभीर्य लक्षात घेऊन शिंदे यांनी नांदेडच्या पोलीस अधीक्षकांशीही फोनवरून संपर्क साधला. त्यांनी घटनेचा सविस्तर आढावा घेत पोलिसांना हल्ल्याचा सखोल तपास करण्याचे निर्देश दिले. तसेच बादल यांच्या सुरक्षेत कोणतीही त्रुटी राहिली असल्यास त्याचीही चौकशी करून संबंधितांवर कारवाई करण्याच्या सूचना त्यांनी दिल्या.
धार्मिक किंवा सामाजिक ठिकाणी अशा प्रकारच्या हिंसक घटनांना महाराष्ट्रात किंवा देशात कोणतीही जागा नसल्याचे शिंदे यांनी म्हटले. या प्रकरणातील हल्लेखोरांना कोणत्याही परिस्थितीत सोडले जाणार नाही. तपासाअंती गुन्ह्यात सहभागी असलेल्या प्रत्येक दोषीचा शोध घेऊन त्यांच्यावर कठोर कायदेशीर कारवाई केली जाईल, असे त्यांनी स्पष्ट केले.
‘कोणालाही पाठीशी घातले जाणार नाही’
धार्मिक स्थळांची पवित्रता, सामाजिक सलोखा आणि कायदा-सुव्यवस्था अबाधित राखणे ही शासनाची सर्वोच्च जबाबदारी आहे. या घटनेची गंभीर दखल घेण्यात आली असून, दोषींवर कठोर कारवाई केली जाईल. कोणत्याही व्यक्तीला पाठीशी घातले जाणार नाही, अशी ग्वाही उपमुख्यमंत्री एकनाथ शिंदे यांनी दिली.