मुंबई : राज्यातील रिक्षा, टॅक्सी आणि ॲपवर चालणाऱ्या कॅबच्या अमराठी चालकांना मराठी भाषेचे प्राथमिक व व्यावहारिक ज्ञान आत्मसात करण्यासाठी राज्य शासनाने आणखी एका महिन्याची मुदत दिली आहे. तपासणीदरम्यान मराठीचे ज्ञान नसल्याचे आढळल्यास चालकाला ही एक महिन्याची सवलत दिली जाईल; मात्र या मुदतीत भाषा न शिकल्यास परवाना तीन महिन्यांसाठी निलंबित केला जाणार आहे. (Taxi)
नव्या नियमांनुसार ही अट चालकांसाठीच नव्हे, तर वाहन परवानाधारकांसाठीही (परमिटधारक) लागू असेल. इलेक्ट्रॉनिक व विद्युत मीटर असलेल्या टॅक्सींच्या परवान्याचे नूतनीकरण करताना मालकाला मराठीचे ज्ञान असल्याचे प्रादेशिक परिवहन प्राधिकरणाकडे सिद्ध करावे लागेल. नियमांचे सतत उल्लंघन केल्यास चालकाला बाजू मांडण्याची संधी देऊन परवाना रद्द करण्याची कारवाई केली जाईल. (Marathi Language)
दरम्यान, राज्यभरात मराठी भाषा प्रशिक्षण वर्गांना प्रचंड प्रतिसाद मिळाला आहे. कोकण मराठी साहित्य परिषदेच्या सहकार्याने राज्यातील ३२ जिल्ह्यांमधील १४० हून अधिक केंद्रांवर हे वर्ग सुरू असून, सुमारे एक लाखांहून अधिक चालकांचे प्रशिक्षण अंतिम टप्प्यात आले आहे. यामध्ये मुंबई आणि महानगर क्षेत्रातून सर्वाधिक प्रतिसाद लाभला आहे.