नांदेड : शिरोमणी अकाली दलाचे प्रमुख आणि पंजाबचे माजी उपमुख्यमंत्री सुखबीर सिंह बादल (Sukhbir Singh Badal) यांच्यावर नांदेडमध्ये धारदार शस्त्राने हल्ला झाल्याची घटना गुरुवारी समोर आली. या घटनेची मुख्यमंत्री देवेंद्र फडणवीस यांनी गंभीर दखल घेत चौकशीचे आदेश दिले आहेत. फडणवीस यांनी बादल यांच्याशी फोनवरून संवाद साधून त्यांच्या प्रकृतीची माहिती घेतली. तसेच नांदेडच्या पोलीस अधीक्षकांकडून घटनेची माहिती मागवली.
मिळालेल्या माहितीनुसार, सकाळी सुमारे 11 वाजता नांदेडमधील माता साहिब गुरुद्वाराजवळ बादल यांच्यावर हल्ला झाला. एका व्यक्तीने धारदार शस्त्राने त्यांच्यावर हल्ला करण्याचा प्रयत्न केला. या घटनेत बादल यांच्या हाताला दुखापत झाली. त्यांच्या सुरक्षेसाठी तैनात असलेल्या पोलीस कर्मचाऱ्याने हल्ला रोखण्याचा प्रयत्न केला. यावेळी पोलीस निरीक्षक संतोष केंद्रे हेही जखमी झाल्याची माहिती आहे.
हल्ल्यानंतर बादल यांना तातडीने नांदेडमधील खासगी रुग्णालयात दाखल करण्यात आले. मुख्यमंत्री कार्यालयाकडून बादल यांची प्रकृती स्थिर असल्याची माहिती देण्यात आली आहे. त्यांच्यावर डॉक्टरांकडून उपचार सुरू आहेत.
दरम्यान, पोलिसांनी या प्रकरणात एका कथित हल्लेखोराला ताब्यात घेतले आहे. प्राथमिक माहितीनुसार, संशयित व्यक्ती निहंग सिंग असल्याचे सांगण्यात येत आहे. हल्ल्याचे नेमके कारण अद्याप स्पष्ट झालेले नाही. पोलिसांकडून घटनेचा तपास सुरू असून हल्ल्यामागील कारण आणि संबंधित व्यक्तीची भूमिका याबाबत माहिती घेतली जात आहे.
घटनेच्या पार्श्वभूमीवर गुरुद्वारा परिसरातील सुरक्षा व्यवस्थेचा आढावा घेण्यात आला आहे. मुख्यमंत्री फडणवीस यांनी संबंधित यंत्रणांना तपासात कोणतीही कसूर होऊ नये, अशा सूचना दिल्याची माहिती आहे.
दरम्यान, नांदेडला जाण्यापूर्वी सुखबीर सिंह बादल यांनी कुटुंबीयांसह तख्त श्री पटना साहिब येथे भेट दिली होती. त्यानंतर ते नांदेडमध्ये आले होते. या घटनेनंतर पोलिसांकडून सीसीटीव्ही फुटेज आणि इतर उपलब्ध पुराव्यांच्या आधारे तपास केला जात आहे.
उपमुख्यमंत्री एकनाथ शिंदेंनी घेतली दखल
पंजाबचे माजी उपमुख्यमंत्री सुखबीर सिंग बादल यांच्यावर नांदेडमधील गुरुद्वारा परिसरात झालेल्या हल्ल्याची उपमुख्यमंत्री एकनाथ शिंदे यांनी गंभीर दखल घेतली. त्यांनी खासदार हरसिमरत कौर बादल यांच्याशी फोनवरून संवाद साधून सुखबीर सिंग बादल यांच्या प्रकृतीची विचारपूस केली आणि हल्लेखोरांवर कठोर कारवाईचे आश्वासन दिले. तसेच नांदेडच्या पोलीस अधीक्षकांशी संपर्क साधून घटनेचा सखोल तपास, सुरक्षेतील त्रुटींची चौकशी आणि दोषींवर कडक कारवाई करण्याचे निर्देश दिले.