इंडोनेशिया : इंडोनेशियाच्या पूर्व भागातील फ्लोरेस बेटाजवळ शनिवारी पहाटे ७.७ तीव्रतेचा शक्तिशाली भूकंप (Indonesia Earthquake) झाला. या भूकंपामुळे मोठ्या प्रमाणात घबराट निर्माण झाली असून अनेक ठिकाणी इमारतींचे नुकसान झाले आहे. सुरुवातीला दोन जणांचा मृत्यू झाल्याची माहिती समोर आली होती; मात्र त्यानंतरच्या अहवालांनुसार मृतांचा आकडा वाढून किमान पाच जणांचा मृत्यू झाल्याचे अधिकाऱ्यांनी सांगितले आहे. (Indonesia Earthquake)
त्सुनामीचा इशारा, नागरिकांचे स्थलांतर :
समुद्रात झालेल्या या शक्तिशाली भूकंपानंतर इंडोनेशियाच्या हवामान आणि भूभौतिकी संस्थेने काही भागांसाठी त्सुनामीचा इशारा जारी केला. किनारी भागातील नागरिकांनी सुरक्षिततेसाठी उंच ठिकाणी धाव घेतली. काही भागात एक मीटरपेक्षा कमी उंचीच्या त्सुनामी लाटा नोंदवण्यात आल्या. परिस्थितीचा आढावा घेतल्यानंतर काही तासांनी त्सुनामीचा इशारा मागे घेण्यात आला. (Indonesia Earthquake)
भूकंपानंतर अनेक आफ्टरशॉक्स :
मुख्य भूकंपानंतर अनेक आफ्टरशॉक्स जाणवले. त्यामुळे नागरिकांमध्ये भीतीचे वातावरण आहे. प्रशासन आणि बचाव पथके नुकसानग्रस्त भागात मदत आणि बचावकार्य करत आहेत. काही ठिकाणी वीजपुरवठा आणि दळणवळण व्यवस्थेलाही फटका बसल्याचे वृत्त आहे. (Indonesia Earthquake)