पालघर : तारापूर एमआयडीसीतील औद्योगिक क्षेत्रात आज (सोमवारी) सकाळी एकापाठोपाठ तीन महाभयंकर स्फोटांनी थरकाप उडाला. बोईसर परिसरातील 'विराज प्रोफाइल' या नामांकित कंपनीत सकाळी पहिल्या शिफ्टचे काम सुरू असतानाच हा भीषण अपघात घडला. स्फोटाचा हादरा इतका शक्तिशाली होता की, कारखान्याच्या इमारतीचे लोखंडी पत्रे उडून दूर फेकले गेले, तर सुरक्षारक्षकांच्या केबिनसह आसपासच्या परिसरातील काचांचा चुराडा झाला.
भंगार वितळवणाऱ्या फर्नेस टँकमध्ये स्फोट
मिळालेल्या माहितीनुसार, तारापूर एमआयडीसीतील 'एसएमएस वन' (SMS-1) प्लांटमध्ये विराज प्रोफाइल कंपनीचा कारखाना आहे. या ठिकाणी भंगार (Scrap) वितळवून त्यापासून स्टील बनवण्याचे काम केले जाते. सोमवारी सकाळी कामगार कामावर हजर झाले आणि नेहमीप्रमाणे उत्पादन सुरू झाले. मात्र, काही वेळातच कंपनीतील फर्नेस टँक (भट्टी) मध्ये अचानक एकापाठोपाठ तीन जोरदार स्फोट झाले. स्फोटाच्या वेळी कंपनीत सुमारे १०० ते १५० कामगार कार्यरत होते.
परिसरात घबराट, ३ जखमींवर उपचार सुरू
स्फोटांचा आवाज एवढा प्रचंड होता की, केवळ कारखान्यातील कामगारच नव्हे तर लगतच्या निवासी क्षेत्रातील नागरिकही भीतीपोटी घराबाहेर पडले. घटनेची माहिती मिळताच स्थानिक पोलीस प्रशासन आणि मदत पथकांनी तातडीने घटनास्थळी धाव घेऊन बचावकार्य सुरू केले. प्राथमिक माहितीनुसार या दुर्घटनेत तीन कामगार जखमी झाले असून, त्यांना तात्काळ जवळच्या रुग्णालयात उपचारासाठी दाखल करण्यात आले आहे. मात्र, स्फोटाची भीषणता पाहाता जखमींचा आकडा वाढण्याची भीती व्यक्त केली जात आहे.
कामगारांच्या सुरक्षेचा प्रश्न पुन्हा ऐरणीवर
तारापूर एमआयडीसी परिसरात वारंवार होणारे छोटे-मोठे अपघात आणि स्फोटांच्या घटनांमुळे कामगारांच्या जीवाचा धोका दिवसेंदिवस वाढत चालला आहे. या ताज्या घटनेमुळे एमआयडीसीतील कंपन्यांच्या सुरक्षा यंत्रणेवर आणि नियमांच्या अंमलबजावणीवर पुन्हा एकदा गंभीर प्रश्नचिन्ह निर्माण झाले असून, स्थानिक कामगारांमध्ये तीव्र चिंता व्यक्त केली जात आहे. पोलीस प्रशासन या स्फोटाच्या नेमक्या कारणांचा अधिक तपास करत आहे.