Nashik : नाशिकच्या मनमाड येथून एक खळबळजनक घटना समोर आली आहे. मनमाड येथील जमधाडे चौकातील रुक्मिणी निवास या इमारतीच्या वरच्या मजल्यावरील खोलीत ५० वर्षीय व्यक्तीचा मृतदेह कुजलेल्या अवस्थेत आढळून आला आहे. या घटनेमुळे परिसरात एकच खळबळ उडाली आहे. मृत व्यक्ती हॉटेलमध्ये काम करीत असल्याची माहिती समोर आली असून शहराच्या मध्यवर्ती ठिकाणी घडलेल्या या घटनेमुळे परिसरात तणावाचे वातावरण निर्माण झाले आहे. (Nashik Crime News)
नेमकं प्रकरण काय ?
चौकात मटण मार्केटला लागून असलेल्या इमारतीच्या दुसऱ्या मजल्यावरील खोलीतून दुर्गंधी येत असल्याची माहिती स्थानिकांनी पोलिसांनी दिली. घटनेची माहिती मिळताच पोलीस निरीक्षक विजय करेसह इतर अधिकारी, कर्मचारी यांनी घटनास्थळी धाव घेऊन घटनेची पाहणी केली. यावेळी पोलिसांना कुजलेल्या अवस्थेतील एक मृतदेह आढळला. तपासणी केली असता पोलिसांना मृतदेहाच्या खिशात काही कागदपत्रे सापडले. यामध्ये आधार आणि पॅनकार्डवर त्याचे नाव अजय हिरामण पवार (५०, रा. एमजीआय कोकण वसाहत, कल्याण) असल्याचे दिसून आले. पोलिसांनी पंचनामा करून मृतदेह विच्छेदनासाठी उपजिल्हा रुग्णालयात पाठविला आहे. त्याचा अहवाल आल्यानंतर मृत्यूच्या कारणाचा उलगडा होईल. (Nashik Crime News)
अजयचा घटस्फोट झाल्यानंतर तो मनमाडला आला होता आणि येथे एका हॉटेलमध्ये काम करीत होता. त्याचा मृत्यू किमान तीन ते चार दिवसांपूर्वी झाला असल्याचा अंदाज आहे. दरम्यान या घटनेमुळे परिसरात तणावाचे वातावरण निर्माण झाले आहे.