Ahilyanagar Crime News : पुणे बसस्थानक परिसरातून एसटी महामंडळातील लिपिकाचे अपहरण करून निर्जनस्थळी नेत मारहाण करत लूट केल्याची घटना समोर आली आहे. या प्रकरणाचा तपास करत कोतवाली पोलिसांच्या (Kotwali Police) गुन्हे शोध पथकाने अवघ्या २४ तासांत दोन संशयित आरोपींना सावेडी परिसरातून अटक केली. त्यांच्याकडून लुटीतील मोबाईल, रोकड आणि दुचाकीसह सुमारे ७२ हजार १०० रुपयांचा मुद्देमाल जप्त करण्यात आला आहे. अभिषेक सुनील शिरसाठ (वय २३) आणि अनुष शांतवन धीवर अशी अटक करण्यात आलेल्या आरोपींची नावे आहेत.
नेमकं प्रकरण काय ?
१८ ऑगस्ट रोजी फिर्यादी पुणे बसस्थानक (Pune Bus Station) परिसरात असताना आरोपींनी त्यांना गाठले. त्यानंतर त्यांना बुरुडगाव रोड परिसरातील निर्जनस्थळी नेण्यात आले. तेथे आरोपींनी लाकडी दांडक्याने तसेच लाथाबुक्क्यांनी मारहाण केली. त्यानंतर त्यांच्या खिशातील मोबाईल जबरदस्तीने काढून घेतला. आरोपींनी मोबाईलचा तसेच ‘फोन पे’चा पासवर्डही बळजबरीने मिळवला. त्यानंतर फिर्यादीच्या खात्यातून ७ हजार १०० रुपये अनोळखी खात्यावर ऑनलाइन ट्रान्सफर करण्यात आले. पैसे घेतल्यानंतर आरोपींनी फिर्यादीला तेथेच सोडून पलायन केले. याप्रकरणी कोतवाली पोलिस ठाण्यात (Kotwali Police Station) गुन्हा दाखल करण्यात आला.
२४ तासांत संशयितांना बेड्या
घटनेचे गांभीर्य लक्षात घेऊन पोलिस निरीक्षक नितीन देशमुख आणि गुन्हे शोध पथकाचे पोलिस उपनिरीक्षक गणेश देशमुख यांच्या मार्गदर्शनाखाली तपास सुरू करण्यात आला. पोलिसांनी परिसरातील सीसीटीव्ही फुटेज आणि तांत्रिक विश्लेषणाच्या आधारे संशयितांचा माग काढला. त्यानंतर सावेडी परिसरातून दोघांना ताब्यात घेण्यात आले. चौकशीत त्यांनी गुन्ह्याची कबुली देत अभिषेक शिरसाठ आणि अनुष धीवर अशी नावे सांगितली. तसेच प्रवीण शेजवळ (रा. कोंढवड, ता. राहुरी, जि. अहिल्यानगर) याच्या साथीने हा गुन्हा केल्याचेही समोर आले. पोलिसांनी आरोपींकडून मोपेड दुचाकी, मोबाईल फोन आणि रोकड असा एकूण ७२ हजार १०० रुपयांचा मुद्देमाल जप्त केला आहे. या प्रकरणाचा पुढील तपास पोलिस उपनिरीक्षक दीपक मेढे करीत आहेत.