नैरोबी : केन्यामध्ये पर्यटकांना सफारीसाठी घेऊन जाणाऱ्या हेलिकॉप्टरचा भीषण अपघात झाला आहे. या दुर्घटनेत हेलिकॉप्टरमधील पायलटसह सर्व सात जणांचा मृत्यू झाला. मृतांमध्ये पाच अमेरिकन पर्यटक, इक्वाडोरमधील एक अधिकारी आणि एका अमेरिकन पत्रकाराचा समावेश असल्याची माहिती समोर आली आहे. (Kenya Helicopter Crash)
लोइसाबा वाइल्डलाइफ रिझर्व्हमधून उड्डाण केल्यानंतर अपघात :
‘एएफपी’च्या वृत्तानुसार, केन्या सिव्हिल एव्हिएशन अथॉरिटीने (KCAA) दिलेल्या माहितीनुसार, हा अपघात स्थानिक वेळेनुसार बुधवारी सकाळी ९ वाजून १३ मिनिटांनी झाला. हेलिकॉप्टरने लोइसाबा वाइल्डलाइफ रिझर्व्हमधून उड्डाण केले होते. त्यानंतर काही वेळातच ते दुर्घटनाग्रस्त झाले.अपघाताची माहिती मिळताच बचाव आणि मदतकार्य सुरू करण्यात आले. केन्या रेड क्रॉसने सोशल मीडियावर शेअर केलेल्या छायाचित्रांमध्ये अपघातस्थळी हेलिकॉप्टरचे अवशेष आणि आग लागल्याचे दिसत होते. (Kenya Helicopter Crash)
अपघाताचे कारण अद्याप अस्पष्ट :
हेलिकॉप्टर नेमके कोणत्या कारणामुळे कोसळले, याची माहिती अद्याप समोर आलेली नाही. दुर्घटनेनंतर संबंधित यंत्रणांनी तपास सुरू केला आहे. अपघातस्थळी पोहोचण्यासाठी अनेक संस्थांचे पथक प्रयत्न करत असल्याचे केन्या रेड क्रॉसने सांगितले. (Kenya Helicopter Crash)
सांबुरू पर्यटकांमध्ये लोकप्रिय :
केन्याच्या उत्तरेकडील सांबुरू परिसर हा नैसर्गिक सौंदर्य आणि वन्यजीवांसाठी प्रसिद्ध आहे. येथे पर्यटक मोठ्या संख्येने सफारीसाठी येतात. परिसरातील पर्वतीय भाग आणि वन्यजीवांचे हवाई दृश्य पाहण्यासाठी हेलिकॉप्टर सेवांचाही वापर केला जातो. दरम्यान, याच वर्षी मार्चमध्ये पश्चिम केन्यामध्ये झालेल्या हेलिकॉप्टर दुर्घटनेत एका खासदारासह सहा जणांचा मृत्यू झाला होता. त्यामुळे या नव्या दुर्घटनेनंतर केन्यामधील हेलिकॉप्टर सुरक्षेचा मुद्दाही पुन्हा चर्चेत आला आहे. (Kenya Helicopter Crash)