Nashik FDA Raid : नाशिकमध्ये एफडीएकडून कारवाईचे सत्र सुरु आहे. खाद्य पदार्थांमध्ये भेसळ करणाऱ्या, नियमांचे उल्लंघन करणाऱ्या हॉटेलवर नाशिकमध्ये एफडीएकडून कारवाईचा बडगा उगारला जात आहे. अशातच आता नियमांचे उल्लंघन केल्याप्रकरणी गंगापूर रोड परिसरातील (Gangapur Road) प्रसिद्ध ‘मे. अवंती स्नॅक्स’ या हॉटेलचा अन्न परवाना प्रशासनाने तातडीने निलंबित केला आहे.अन्न व औषध प्रशासनाने (FDA) सुरू केलेल्या ‘सेफ फूड, सेफ महाराष्ट्र’ या विशेष मोहिमेंतर्गत नाशिकमध्ये (Nashik) ही मोठी कारवाई करण्यात आली आहे.
मिळालेल्या गोपनीय माहितीच्या आधारे एफडीएच्या पथकाने मंगळवारी गंगापूर रोड, पंपिंग स्टेशन परिसरातील मामामुंगी मंगल कार्यालयाजवळ असलेल्या अवंती स्नॅक्सवर छापा टाकला. या तपासणी दरम्यान अन्न सुरक्षा व मानदे कायदा, २००६ च्या अंतर्गत स्वच्छता आणि अन्न हाताळणीबाबत अनेक गंभीर त्रुटी आढळून आल्या. दरम्यान, या नियमावलीच्या तरतुदींचा भंग झाल्याने एफडीएने बुधवार पासून अवंती स्नॅक्सचा परवाना निलंबित केला आहे.
तपासणीत काय त्रुटी आढळल्या ?
अस्वच्छता : कच्चे अन्नपदार्थ स्वीकारताना आवश्यक ती तपासणी केली जात नव्हती, तसेच भिंतींची रंगरंगोटी व स्वच्छता राखली गेली नाही
वृत्तपत्रांचा वापर : तयार अन्नपदार्थ ठेवण्यासाठी आणि ते ग्राहकांना देण्यासाठी वृत्तपत्रांचा वापर केला जात होता.
वैद्यकीय तपासणीचा अभाव : महत्त्वाचे म्हणजे आस्थापनेत काम करणाऱ्या कामगारांची वैद्यकीय तपासणी प्रमाणपत्रे उपलब्ध नव्हती.
कीटक नियंत्रण नाही : उपाहारगृहात पेस्ट कंट्रोल केलेले नव्हते.