- भाजपकडून व्हिडिओ पुरावा सादर; काँग्रेसचा 'फर्जीवाडा' उघड झाल्याचा दावा
मुंबई : लोकसभेतील विरोधी पक्षनेते राहुल गांधी यांच्या पुण्यातील 'छात्रों की गूंज' या कार्यक्रमावरून नवा वाद निर्माण झाला आहे. या कार्यक्रमात सहभागी होण्यासाठी आणि त्यांच्याविषयी सकारात्मक व्हिडिओ बनवण्यासाठी 'जेन-झी' इन्फ्लुएंसर्सना २५ हजार रुपयांची ऑफर दिली जात असल्याचा आरोप भाजपने केला आहे. भाजपचे राष्ट्रीय प्रवक्ता प्रदीप भंडारी यांनी या संदर्भातील एक व्हिडिओ आणि कॉल रेकॉर्डिंग सोशल मीडियावर जाहीर करत जोरदार निशाणा साधला आहे. (Rahul Gandhi)
काँग्रेस पक्षाकडून तरुणांना, विशेषतः 'जेन-झी' पिढीला आकर्षित करण्यासाठी विविध संवाद कार्यक्रमांचे आयोजन केले जात असून, राहुल गांधी स्वतः यात मुख्य वक्ता म्हणून सहभागी होत आहेत. मात्र, पुणे येथील कार्यक्रमात आर्थिक मोबदला देऊन कृत्रिमरित्या गर्दी जमवली जात असल्याचा दावा भाजपने केला आहे. (Rahul Gandhi)
समोर आलेल्या कथित ऑडिओ-व्हिडिओ क्लिपमध्ये एका युवतीला कार्यक्रमात सहभागी होण्यासाठी आणि राहुल गांधींच्या बाजूने प्रचार करणारे व्हिडिओ तयार करण्यासाठी २५ हजार रुपयांचे आमिष दाखवले जात असल्याचे स्पष्टपणे दिसत आहे, असा दावा भंडारी यांनी केला आहे. पैशांचे आमिष दाखवून आणि पीआर एजन्सीच्या माध्यमातून सोशल मीडियावर खोटा माहोल तयार करून राहुल गांधींसाठी जनसमर्थन असल्याचे भासवण्याचा काँग्रेसचा हा केविलवाणा प्रयत्न असल्याचा घणाघात भाजपने केला आहे. या प्रकारामुळे काँग्रेसचा खरा चेहरा आणि 'फर्जीवाडा' जनतेसमोर आल्याचा आरोप भंडारी यांनी केला आहे. (Rahul Gandhi)