Jalgaon : मुंबईवरील २६/११ दहशतवादी हल्ल्याप्रकरणी फरार असलेल्या सहा पाकिस्तानी दहशतवाद्यांविरोधात आता भारतातच महत्त्वाची कायदेशीर प्रक्रिया सुरू झाली आहे. हाफिज सईद (Hafiz Saeed), झकी-उर-रहमान लखवी (Zaki-ur-Rahman Lakhvi) आणि साजिद मीर (Sajid Mir) यांच्यासह सहा आरोपींविरोधात त्यांच्या अनुपस्थितीत खटला चालवण्याची प्रक्रिया सुरू झाल्याची माहिती विशेष सरकारी वकील आणि राज्यसभा खासदार ॲड. उज्ज्वल निकम (Adv. Ujjwal Nikam) यांनी दिली. या सर्व फरार दहशतवाद्यांविरोधात भारतीय नागरिक सुरक्षा संहिता २०२३ (Indian Civil Security Code 2023) अंतर्गत त्यांच्या अनुपस्थितीत खटला चालवण्याची महत्त्वपूर्ण प्रक्रिया सुरू झाल्याची माहिती त्यांनी पत्रकारांशी बोलताना दिली.
आरोपींना न्यायालयासमोर हजर राहण्यासाठी जाहीरनामा
या फरार आरोपींना न्यायालयासमोर हजर राहण्यासाठी जाहीरनामा काढण्यात आला आहे. जाहीरनामा प्रसिद्ध झाल्यानंतर ९० दिवसांच्या आत आरोपींविरोधातील पुरावे न्यायालयासमोर सादर केले जाणार आहेत, असेही त्यांनी सांगितले. विशेष म्हणजे, आरोपी न्यायालयात प्रत्यक्ष हजर नसले तरीही, कायद्यानुसार त्यांना त्यांच्या बचावाची संपूर्ण संधी दिली जाईल. जर हे आरोपी पुढील तीन वर्षांच्या कालावधीतही न्यायालयासमोर हजर झाले नाहीत, तर न्यायालयाचा निकाल अंतिम मानला जाऊ शकतो, असे कायदेशीर मत निकम यांनी व्यक्त केले. २६/११च्या दहशतवादी हल्ल्यामागे भारताविरोधात अघोषित युद्ध छेडण्याचा उद्देश होता. अजमल कसाब (Ajmal Kasab) विरोधातील खटल्यात हा मुद्दा मांडण्यात आला होता आणि सर्वोच्च न्यायालयानेही (Supreme Court) तो मान्य केला आहे.
डेव्हिड हेडलीची साक्ष आणि...
२६/११ च्या हल्ल्याचा मुख्य उद्देश भारताविरोधात अघोषित युद्ध छेडण्याचा होता. अजमल कसाबविरोधातील खटल्यात हा आरोप करण्यात आला होता आणि सर्वोच्च न्यायालयानेही तो मान्य केला आहे. आता हाफिज सईद, झकी-उर-रहमान लखवी, मेजर अब्दुल पाशा, अबू काफा व साजिद मीर यांच्यासह सहाही पाकिस्तानी आरोपींविरोधात डेव्हिड हेडलीच्या साक्षीसह भक्कम पुरावे न्यायालयासमोर सादर करण्यात आल्याचे ॲड. निकम यांनी सांगितले. दरम्यान हाफिज सईद, झकी-उर-रहमान लखवी, मेजर अब्दुल पाशा, अबू काफा आणि साजिद मीर यांच्यासह सहा पाकिस्तानी आरोपींविरोधातील ही कायदेशीर प्रक्रिया आता पुढे सरकणार असल्याने २६/११ हल्ल्याच्या सूत्रधारांवरील कारवाईला महत्त्वाचे वळण मिळण्याची शक्यता आहे.