नवी मुंबई : भारताचा स्टार भालाफेकपटू आणि ‘गोल्डन बॉय’ नीरज चोप्रा (Neeraj Chopra) याने लुसाने डायमंड लीगमध्ये (Lausanne Diamond League) दमदार कामगिरी करत यंदाच्या हंगामातील सर्वोत्तम थ्रो नोंदवला. नीरजने ८८.०५ मीटर भालाफेक करत दुसरे स्थान मिळवले. मात्र, अवघ्या ९ सेंटीमीटरच्या फरकामुळे त्याला सुवर्णपदकापासून वंचित राहावे लागले.
श्रीलंकेचा रुमेश तरंगा पथिरागे याने ८८.१४ मीटरचा थ्रो करत पहिला क्रमांक पटकावला. तर ग्रेनेडाचा अँडरसन पीटर्स ८६.६९ मीटरच्या थ्रोसह तिसऱ्या स्थानावर राहिला.
दुसऱ्या प्रयत्नात नीरजची जबरदस्त झेप :
नीरजने (Neeraj Chopra) स्पर्धेची सुरुवात ८३.५४ मीटरच्या थ्रोने केली. त्यानंतर त्याने ८३.७२ मीटरची कामगिरी नोंदवली. दुसऱ्या फेरीत नीरजने थेट ८८.०५ मीटरचा थ्रो करत आघाडी घेतली. त्यामुळे काही काळ तो अव्वल स्थानावर होता. मात्र, अखेरच्या फेरीत पथिरागेने ८८.१४ मीटरचा शानदार थ्रो करत नीरजला मागे टाकले. त्याने ही आघाडी अखेरपर्यंत कायम ठेवत सुवर्णपदकावर नाव कोरले. (Lausanne Diamond League)
डायमंड लीग फायनलच्या शर्यतीत नीरज मजबूत :
लुसाने डायमंड लीगमधील नीरजचे (Neeraj Chopra) दुसरे स्थान त्याच्यासाठी महत्त्वाचे ठरले आहे. या स्पर्धेपूर्वी नीरजच्या खात्यात केवळ पाच गुण होते आणि तो हंगामातील गुणतालिकेत सातव्या स्थानावर होता. डायमंड लीग फायनलसाठी भालाफेकमधील अव्वल सहा खेळाडूंना थेट पात्रता मिळते. त्यामुळे लुसानेमध्ये मिळवलेले गुण नीरजसाठी फायदेशीर ठरणार आहेत. ज्यूरिखमध्ये होणाऱ्या अंतिम पात्रता स्पर्धेपूर्वी नीरजने फायनलमध्ये स्थान मिळवण्याच्या शर्यतीत आपली दावेदारी आणखी मजबूत केली आहे. (Lausanne Diamond League)