यादद्री : तेलंगणातील यादद्री भोंगीर जिल्ह्यात फार्मा कंपनीत रिॲक्टरचा स्फोट होऊन दोन कामगारांचा मृत्यू झाल्याची धक्कादायक घटना समोर आली आहे. भूदान पोचमपल्ली मंडलातील डोंथिगुडम येथील हझेलो फार्मा कंपनीत शुक्रवारी रात्री उशिरा हा स्फोट झाला. या दुर्घटनेत सहा कामगार जखमी झाले आहेत. ( Pharma Factory Blast)
मिळालेल्या माहितीनुसार, मृतांची ओळख राजशेखर आणि नागराजू अशी झाली आहे. दोघांचाही रुग्णालयात उपचारादरम्यान मृत्यू झाला. जखमींना पुढील उपचारांसाठी हैदराबादमधील खासगी रुग्णालयात दाखल करण्यात आले असून, त्यापैकी दोघांची प्रकृती चिंताजनक असल्याची माहिती आहे.
स्फोटाचा मोठा आवाज ऐकू आल्यानंतर तसेच कंपनीच्या परिसरातून आगीच्या मोठ्या ज्वाला दिसल्यानंतर स्थानिकांनी तातडीने प्रशासनाला माहिती दिली. कंपनीच्या अग्निशमन दलाने सुरुवातीला आग नियंत्रणात आणण्याचा प्रयत्न केला. त्यानंतर पोलीस आणि अग्निशमन दलाचे जवान घटनास्थळी दाखल झाले. अग्निशमन दलाच्या पथकांनी शर्थीचे प्रयत्न करून आग नियंत्रणात आणली. ( Pharma Unit Explosion)
विशेष म्हणजे, याच कंपनीत यापूर्वीही दुर्घटना घडली होती. 16 जुलै रोजी रिॲक्टरमधून विषारी वायू बाहेर पडल्याने आंध्र प्रदेशातील अनंतपूर येथील कर्मचारी कृष्णा रेड्डी यांचा मृत्यू झाला होता.
अवघ्या काही आठवड्यांच्या अंतराने याच युनिटमध्ये पुन्हा दुर्घटना घडल्याने स्थानिकांमध्ये चिंता आणि संताप व्यक्त होत आहे. कंपनीत सुरक्षा नियमांचे योग्य पालन केले जात नसल्याचा आरोप स्थानिकांनी केला असून, प्रशासनाने कंपनीची सखोल तपासणी करून सुरक्षा उपायांमध्ये त्रुटी आढळल्यास संबंधितांवर कठोर कारवाई करावी, अशी मागणी केली आहे. ( Telangana Pharma Company)
