मुंबई : महाराष्ट्राच्या राजकीय आणि सामाजिक वर्तुळात चर्चेत राहिलेल्या भोंदू कॅप्टन अशोक खरात प्रकरणावर आधारित 'महाराष्ट्र एपस्टीन फाईल्स' या मराठी चित्रपटाची सध्या जोरदार चर्चा सुरू आहे. काही दिवसांपूर्वी चित्रपटाची घोषणा झाल्यानंतर आता त्याचा टीझर प्रदर्शित करण्यात आला आहे.
टीझरमध्ये "कोणाच्या डोक्यावर बॉम्ब लागणार...?" असा मजकूर पाहायला मिळत असून, यामुळे चित्रपटाच्या कथेबाबत प्रेक्षकांची उत्सुकता आणखी वाढली आहे. सत्य घटनांवर आधारित असल्याचा दावा करण्यात आलेल्या या चित्रपटात काही वास्तवातील व्यक्तिरेखांवर आधारित पात्रेही पाहायला मिळणार असल्याचे सांगण्यात आले आहे.
दीपाली सय्यद मुख्य भूमिकेत
अभिनेत्री दीपाली सय्यद चित्रपटात प्रमुख भूमिका साकारत असून, अभिनेते उदय टिकेकर यांचाही महत्त्वाचा सहभाग आहे. टीझरमधील दीपाली सय्यद यांचा लूक लक्षवेधी ठरत आहे.
'महाराष्ट्र एपस्टीन फाईल्स'ची निर्मिती आनंदी पिक्चर्स अमरावती, सचिन रोरे पाटील, फ्लेमिंगो क्रिएशन आणि मातोश्री एन्टरटेन्मेंट वर्ल्ड यांच्या माध्यमातून करण्यात येत आहे. देवेंद्र भट, सूर्यकांत भुंडे आणि प्रशांत कदमपुरे हे निर्माते आहेत, तर स्वरूप बी. सावंत यांनी चित्रपटाचे दिग्दर्शन केले आहे.
चित्रपटाची कथा सागरकुमार एस. जैन यांनी लिहिली असून पटकथा आणि संवाद संजय नवगिरे यांचे आहेत. आकाश काकडे सिनेमॅटोग्राफी, तर अक्षय आंबेकर कला दिग्दर्शनाची जबाबदारी सांभाळत आहेत.
2 ऑक्टोबरला चित्रपट प्रदर्शित होणार
'महाराष्ट्र एपस्टीन फाईल्स' हा चित्रपट 2 ऑक्टोबर 2026 रोजी संपूर्ण महाराष्ट्रात प्रदर्शित होणार असल्याची माहिती देण्यात आली आहे. खरात प्रकरणाच्या पार्श्वभूमीवर नेमकी कोणती कथा आणि कोणते पैलू चित्रपटातून मांडले जाणार, याची उत्सुकता आता प्रेक्षकांना लागली आहे.